Инде Алмазға күсәм. Беҙ уның менән быйыл яҙ осраштыҡ бит! Бик күп йылдар үткәндән һуң. Һәм, беләһегеҙме, ҡайҙа? Зыяратта! Уның атаһы ла, минең әсәйем менән атайым да, беҙҙе айырыуҙа ситтән булһа ла ҙур роль уйнаған ике ағайым да бер зыяратта ерләнгән. Эйе, теге “һала” торған ағайҙарым инде иҫән түгел – араҡы уларҙың икеһенең дә ғүмерен шаҡтай ҡыҫҡартты. Атай ҙа иҫән түгел. Әммә һүҙ ыңғайында әйтәйем әле, ул һуңғы йылдарҙа эсеүен ташланы. Мәсеткә йөрөй башланы, шөкөр, был донъянан намаҙлы, доғалы булып китте. Бының өсөн әле лә һөйөнәм. Тағын ситкә киттем. Май байрамдары алдынан ауылдаштар: «Өмә үткәрәбеҙ. Ҡайтығыҙ! Зыяратты йыйыштырырға, тәртипкә һалырға кәрәк», – тип хәбәр итте. Ундай саранан ситтә ҡалып булмай бит инде. Былай ҙа һәр йылды яҙын ҡайтып, үҙебеҙҙекеләрҙең ҡәберҙәрен ҡарап килә инек. Был юлы бөтә туғандар йыйылып ҡайттыҡ. Ауылыбыҙ тарихында беренсе бындай өмә бит! Улы менән Алмаз да ҡайтҡан булып сыҡты. Ҙурҙан ҡупҡан – зыярат өҫтөн таҙартырға ҙур крандар ҙа килтерткән. Шулай осраштыҡ. Иҫәнләшеүгә аңланым – беҙ инде бөтөнләй башҡа кешеләр. Әммә һөйләшә торған һүҙҙәребеҙ барыбер күп булып сыҡты: класташтарҙы осо-ҡырыйы булмаған хәтирәләр бәйләй бит ул. Ғаиләләребеҙ тураһында ла телгә алдыҡ. Уның хәҙерге ҡатыны рус милләтенән икән. «Мәскәүҙә татарҙы ҡайҙан табаһың?» – ти. Эҙләгән кеше таба, тип әйтеп торманым инде. Алмаз үҙе лә татарса шаҡтай ауыр һөйләшә. Һөйләмде башлай ҙа тамамлай алмай, әле ул һүҙ нисек тип һорай, әле теге-был һүҙҙе иҫенә төшөрә алмай тора. Ҙур ғына етәксе урында эшләгәнен белә инем, тағы ла үрләгән икән. Уҡығанда уҡ башлы ине – тормошта күпкә өлгәшкәненә шаҡ ҡатманым былай. Бик оҙаҡ һөйләшеп торғас, мәсеткә инеп сыҡтыҡ (ул ауылыбыҙҙа ҙур мәсет һалдырған ине). Унан, күп итеп күстәнәстәр алып, беҙҙе уҡытҡан математика уҡытыусыһының хәлен белдек (ул күптән инде ауырып түшәктә ята). Беҙҙе күргәс, уҡытыусыбыҙ бик һөйөндө. «Һеҙ икегеҙ ҙә – ауылыбыҙҙың ғорурлығы, ҡасандыр һеҙҙе уҡытҡаныма шатланам», – тине. Алмаз менән дуҫтарса айырылыштыҡ. Киләһе йыл бергәләп «Ауыл йыйыны»н уҙғарырға план ҡорҙоҡ. Тыуған ауылды йәшәтәһе килә бит. Һаубуллашҡанда бер-беребеҙгә бары бәхет теләнек. Уңыштарыма ул һөйөндө кеүек. Мин иһә уныҡыларға ысын күңелдән һөйөндөм. Һәм уға ысынлап бәхет кенә теләнем. Тағы бер нимәгә бик һөйөндөм: ярай әле әсәһе ҡаршы төшкән, ярай әле бергә булмағанбыҙ. Уның йәнәшәһендә мин мин булмаҫ инем. Алтын ситлектә ултырам, тип кенә йырлап булмай бит. Яҙмыш беҙҙе юҡҡа айырмаған... Ахырҙа ағайҙарым тураһында бер һүҙ әйтергә теләйем. Береһенең ҡатыны ағайҙы ерләргә лә килмәне, уның улын да күргәнем юҡ. Ә бына икенсе ағайымдың ике балаһы, ҡатыны менән бик яҡшы аралашабыҙ. Уның оло улы диндә, биш намаҙын ҡалдырмай. Ҙур йорттар һалды, өйләнде, үҙенең эше бар. Ҡыҙы ла бик булдыҡлы булып сыҡты, ул да үҙ эшен асты. Кейәүебеҙҙең дә шулай уҡ үҙ эше. Өс бала тәрбиәләйҙәр. Кешегә иҫерек балаһы тип кенә ҡарарға ярамай тип әйтеүем. (Башын уҡығыҙ: https://bashgazet.ru/articles/y-m-i-t/2023-07-23/min-eskese-y-y-3351884 Дауамын уҡығыҙ: https://bashgazet.ru/articles/y-m-i-t/2023-07-24/min-eskese-y-y-3353059 Автор фотоһы. Сығанаҡ: https://vk.com/public213168279