Республикаға идара итеү үҙәгендә Рәсәйҙең төҙөлөш, торлаҡ һәм коммуналь хужалыҡ министры Ирек Фәйзуллин менән Башҡортостан Башлығы Радий Хәбиров республикала төҙөлөш комплексын һәм коммуналь инфраструктураны үҫтереү мәсьәләләре буйынса "түңәрәк өҫтәл" үткәрҙе. Ирек Фәйзуллин республиканың төҙөлөш тармағы үҫеше кимәлен юғары баһаланы. Тораҡ төҙөү буйынса Башҡортостан илебеҙҙә алдынғылар иҫәбендә бара. - Бар программаларҙы ла тәғәйен ваҡытта, маҡсатлы күрһәткестәргә өлгәшеп башҡараһығыҙ, - тине Ирек Фәйзуллин. - Башҡортостандың ҡала төҙөлөшө потенциалы үҫешә, йорттар төҙөү буйынса алға барыш күҙәтелә. - Рәсәйҙең Төҙөлөш министрлығына төҙөүселәребеҙгә күрһәткән ярҙам өсөн рәхмәт белдерәбеҙ. Һеҙҙең менән даими бәйләнеш бар, бик һөҙөмтәле хеҙмәттәшлек итәбеҙ, - тине Радий Хәбиров. Ултырыш алдынан федераль министрлыҡ етәксеһе Республикаға идара итеү үҙәгенең структураһы һәм мөмкинлектәре менән танышты. Башҡортостан Башлығының социаль коммуникациялар буйынса идаралығы етәксеһе Елена Прочаковская үҙәктең эше тураһында һөйләне. Ирек Фәйзуллин республикала сүп-сар сығарыуға тарифтар менән ҡыҙыҡһынды. Әйткәндәй, Башҡортостанда был хеҙмәткә хаҡтар - Волга буйы федераль округында иң түбәндәрҙең береһе. Бынан тыш, Республикаға идара итеү үҙәгендә Рәсәйҙең төҙөлөш һәм торлаҡ-коммуналь хужалығы министры Башҡортостандың Үҫеш корпорацияһы һәм Стратегик эшләнмәләр үҙәге эшмәкәрлеге менән танышты. Ике институт та инвесторҙар йәлеп итеү өлкәһендәге эре проекттарға етәкселек итә. - Республикаға идара итеү үҙәге - һоҡланғыс объект. Рәсәй төбәктәренә был алымды ҡарарға һәм уның нисек барлыҡҡа килгәнен, эшләгәнен анализларға кәрәк. Башҡарған эшегеҙҙең күләменә хайран ҡалдым. Сәнәғәти яҡтан үҫешкән, экологик яҡтан таҙа, яҡшы инфраструктуралы төбәктә етди бурыстарҙы үтәүсе республика Башлығына һәм бөтә командаға уңыштар теләйем, - тине Ирек Фәйзуллин. Сығанаҡ: glavarb.ru