Бөгөн Республика йортонда Башҡортостан Башлығы Радий Хәбиров Рәсәйҙең төҙөлөш һәм торлаҡ-коммуналь хужалыҡ министры Ирек Фәйзуллин менән осрашты. Көн тәртибендә федераль министрлыҡ менән республика Хөкүмәтенең хеҙмәттәшлеген үҫтереү, шулай уҡ республикала күләмле инфраструктура проекттарын, шул иҫәптән "Торлаҡ һәм ҡала мөхите" милли проектына ярашлыларын тормошҡа ашырыуға ярҙам итеү тора. Рәсәй министры торлаҡ, инфраструктура һәм социаль объекттарҙы сафҡа индереүҙә Башҡортостандың алдынғы урындарҙа барыуын билдәләне. Беренсе ярты йыллыҡта Башҡортостанда файҙаланыуға тапшырылған торлаҡ күләме 1,57 миллион квадрат метр тәшкил итә, был иһә уҙған йылдың ошо уҡ осоро менән сағыштырғанда 5,6 процентҡа күберәк. Осрашыуҙа "Торлаҡ һәм ҡала мөхите" милли проектына ингән "Стимул" программаһын тормошҡа ашырыу мәсьәләләре тикшерелде. Уның бурысы - бюджет инвестициялары ярҙамында торлаҡ төҙөлөшө объекттарында социаль, инженер һәм транспорт инфраструктураһын төҙөүгә булышлыҡ итеү. Башҡортостанда был программа буйынса Өфө, Октябрьский, Салауат ҡалаларында һәм Өфө районында 12 объект төҙөлә. "Стимул" программаһы аша республика бөтәһе 12 миллиард һум федераль аҡса йәлеп иткән. Милли проекттың тағы бер йүнәлеше - "Уңайлы ҡала мөхите булдырыу" федераль проекты. Быйыл уның буйынса 122 йәмәғәт майҙанын төҙөкләндереү ҡаралған. Шуны билдәләп үтергә кәрәк: федераль проектҡа ярашлы, уңайлы ҡала мөхите булдырыу буйынса иң яҡшы проекттар буйынса Бөтә Рәсәй конкурсының сираттағы этабы үтте, унда Баймаҡта һәм Ишембай районының Верхотор ауылында биләмәләрҙе төҙөкләндереү концепциялары еңеүсе булды. Республикаға уларҙы тормошҡа ашырыу өсөн 138 миллион һум аҡса бүленәсәк. Сығанаҡ: glavarb.ru