Миллионлап урлайҙар. Кем ғәйепле?

Рәсәй Эске эштәр министрлығының Белорет районы буйынса бүлегенә 50 йәшлек ир мөрәжәғәт иткән. Ул оҙаҡ ваҡыт интернет киңлектәрендә автомобиль двигателе һатыу тураһында тәҡдимдәрҙе күҙәтеп бара һәм бер мәл двигатель һатыу хаҡында иғланды күрә. Мутлашыусы әҙәм үҙен автозапчастар һатыу менән шөғөлләнгән компания хеҙмәткәре тип таныштырғанлыҡтан, уның тәҡдиме двигатель алырға теләгән кешелә бер ниндәй ҙә шикләнеү тыуҙырмай. Шуға ла ул тауар өсөн 51 мең һумдан ашыу аҡсаһын күсерә, әммә әйберҙе көтөп ала алмай. Ә уның менән хат алышҡан мутлашыусы бәйләнешкә сығыуҙан туҡтай. Был мутлашыу осрағы буйынса Рәсәй Енәйәт кодексының 159-сы статьяһының 2-се өлөшө буйынса енәйәт эше ҡуҙғатылған. Яңауыл ҡалаһында ла мутлашыу осрағы теркәлгән. Яр Саллы ҡалаһынан 25 йәшлек егет полиция бүлегенә мөрәжәғәт итә. Ул, популяр һатып алыу-һатыу сайтында “Лада Калина” автомобилен һатыу һылтауы менән, уға бер ир мөрәжәғәт иткән, тип раҫлай. Мутлашыусы әле командировкала булыуын һәм автомобилде уның ҡатыны күрһәтәсәге тураһында белдерә. Машина алырға теләгән кешенән алдан түләү сифатында 5000 һум күләмендә аҡса күсереүҙе, ә һуңыраҡ бөтә автомобиль өсөн тағы ла 140 мең һум аҡса ебәреүҙе һорайҙар. Баҡтиһәң, ысын машина һатыусы аҡса алмаған. Аферист иһә машина эҙләгән кеше менән дә, автомобиль хужаһы менән дә бер юлы хат алышҡан. 23 йәшлек ир Рәсәй Эске эштәр министрлығының Салауат ҡалаһы буйынса бүлегенә мөрәжәғәт иткән. Ул да мутлашыусыларҙың ауына эләкән. Уға хоҡуҡ һаҡлау органдары һәм банк учреждениелары хеҙмәткәрҙәре шылтыратып, төрлө банктарҙа кредит алырға күндергәндәр. Мутлашыусылар уны башҡалар уның исеменән кредит алырға һәм сит ил гражданы иҫәбенә күсерергә теләйҙәр тип раҫлай. Ҡурҡып, ир 250 мең һум күләмендә йыйған аҡсаһын, шулай уҡ ҡулаҡсаға әйләнгән кредит аҡсаһын ала, шунан һуң бөтә сумманы банкомат аша телефон мутлашыусыларына күсерә. Дөйөм алғанда зыян күреүсе 3,5 миллион һумдан ашыу аҡсаһын юғалтҡан. Башҡортостан буйынса Эске эштәр министрлығы иҫкәртә: таныш булмаған кешеләргә аҡса күсермәгеҙ, бигерәк тә телефон мутлашыусыларының төрлө һылтауҙары менән кредит алмағыҙ. Иҫегеҙҙә тотоғоҙ, мутлашыусылар үҙҙәрен банк хеҙмәткәрҙәре тип таныштыра һәм ялған номерҙар ҡуллана ала. Шулай уҡ уларға үҙегеҙҙең шәхси мәғлүмәттәрегеҙҙе һәм картағыҙҙың реквизиттарын тапшырмағыҙ. Һаҡ булығыҙ. Автор: Азамат Сәғитов, Башҡортостан буйынса Эске эштәр министрлығының матбуғат хеҙмәтенән.