Бар бит арабыҙҙа шәп йәштәр! Улар буй етмәҫлек кеүек тойолған юғары уңыштарға өлгәшә. Шундай егеттәрҙең береһе - Баймаҡ районы Әбделкәрим ауылынан Ғәзим Мөхәмәтйәнов. Ул Мәскәү политехник университетын тамамлаған. Студент сағында уҡ электр мотоциклдар, башҡа заманса ҡоролмалар проектын эшләгән. Уның техника өлгөләре Испанияла уҙғарылған ярыштарҙа еңеү яулаған. Алтын ҡуллы, уҡыуҙа алдынғылыҡты бирмәгән Баймаҡ егетенә уҡыу йортонда хеҙмәт урыны тәҡдим иткәндәр, һөҙөмтәлә яҡташыбыҙ үҙе белем алған университетта эшкә ҡалған. Ғәзим уңыш ҡаҙаныуын дауам итә. Мәҫәлән, быйыл яҙ Мәскәү политехник университеты “Веломоторс” (Stels) компанияһы өсөн квадроциклға тест үткәргән. Уны Ғәзимдең командаһы эшләгән. Бына шулай баш ҡаланы ла яулай шәп Баймаҡ егеттәре! Афарин, Ғәзим! Фото "Бәйләнештә"ге Баймаҡ районы төркөмөнән.