Өфөлә барған “Беҙ бергә. Спорт” йәйге Сурдлимпия уйындарында көйәрмәндәр араһында Рәсәй Геройы, илебеҙҙең 113-сө космонавы Сергей Ревинды осратырға мөмкин. Ул ер тирәһендәге киңлектә 125 тәүлек үткәргән. Ә уйындарҙа ул улы Ярослав өсөн “көйә”. Өҫтәүенә, Сергей Ревин – Рәсәйҙең теннис буйынса Сурдлимпия йыйылма командаһының попечителлек советы рәйесе. - Улым менән Башҡортостанда беренсе тапҡыр ғына түгелбеҙ. Осоштарҙан һуң “Яҡтыкүл” һәм “Янғантау” шифаханаларында сәләмәтлегемде нығытҡайным. Был юлы Башҡортостанда икенсе статустамын - Рәсәйҙең теннис буйынса Сурдлимпия йыйылма командаһының попечителлек советы рәйесемен. Бағыусыларҙы һаулыҡ мөмкинлектәре сикләнгәндәргә спорт менән шөғөлләнеүҙәрендә һәм ярыштарҙа ҡатнашыуында булышлыҡ итеүгә йәлеп итергә тырышабыҙ, - тип белдерҙе Сергей Ревин. Улының кисәге сығышы алдынан Сергей Дәүләкән районындағы Аэрокосмик мәктәптә булырға һәм балалар менән осрашырға өлгөргән. Ул Калиновка ауылында урынлашҡан. Ярослав та атаһынан ҡалмаҫҡа тырыша, теннис менән етди шөғөлләнә, ҙур еңеүҙәргә ынтыла. - 2006 йылдан теннис менән Мәскәүҙәге Ишетеү һәләте боҙолғандар өсөн адаптив спорт мәкәтбендә шөғөлләнәм. Төркиәлә үткәрелгән Сурдлимпиадала дүртенсе урын яуланым. Мөһим матч көнө бик эҫе булды, 35 градус тирәһе ине. Еңеү өсөн тын алыу етмәне. Быйыл - икенсе, уңайлы шарттар. Израиль спортсыһы менән уйнайым. Алдан уның һайлау матчтарында нисек уйнауын ҡараным һәм баһаланым, - ти Ярослав. Йәйге Сурдлимпия уйындары 23 июлдән 2 авгусҡа тиклем үткәрелә. Һаңғырауҙар араһында спорттың 21 төрө - бадминтон, гандбол, баскетбол, еңел атлетика, өҫтәл теннисы, йөҙөү, маунтинбайк велосипед спорты, шоссе велосипеды спорты, атыу, спорт ориентирлауы, волейбол, каратэ, тхэквондо, футбол, ирекле көрәш, грек-рим көрәше, дзюдо, самбо, теннис, пляжлы волейбол, боулинг – буйынса үткәрелә. Фото: vk.com/myvmestesport_ufa