Ауыл ипотекаһы. Уны нисек юлларға?

Өсөнсө йыл рәттән Башҡортостан Республикаһы ауыл ипотекаһын ҡулланыу буйынса Рәсәйҙә тәүгеләр иҫәбендә. Ауылда йәшәргә теләүселәргә ташламалы кредит 2020 йылдан алып «Ауыл биләмәләрен комплекслы үҫтереү» федераль программаһы сиктәрендә бирелә. Программа Рәсәй ауыл хужалығы министрлығы тарафынан тормошҡа ашырыла. — 2023 йылдың беренсе яртыһында «Ауыл ипотекаһы» программаһы менән 1 миллиард 161 миллион һум күләмендә ташламалы кредиттар бирелгән, 450 кеше торлаҡ шарттарын яҡшыртҡан. Дәүләт программаһында ҡатнашыу шарттарын киңәйтеү буйынса ил Хөкүмәте ҡарар сығарҙы, һөҙөмтә булараҡ төбәктә ауыл ипотекаһын биреү темптарының көсәйеүен көтәбеҙ. Хәҙер ташламалы кредит күләме 3 миллион һумдан 6 миллион һумға тиклем артасаҡ, шулай уҡ кредитты Ауыл хужалығы министрлығы билдәләгән төп тораҡ пункттарҙа күп ҡатлы йорттарҙа фатир һатып алыуға тотонорға мөмкин, — ти Башҡортостандың ауыл хужалығы министры вазифаһын башҡарыусы Рәмил Нуриәхмәтов. Башҡортостанда ауыл ипотекаһының төп операторы — Рәсәй ауыл хужалығы банкы. 2020 йылдан «Россельхозбанк»тың Башҡортостан бүлексәһе дөйөм суммаһы 10,8 миллиард һум тәшкил иткән ташламалы ипотека кредиты бирә, кредиттар биш мең самаһы кешенең йәшәү шарттарын яҡшыртыуға булышлыҡ икән. «Ауыл биләмәләрен комплекслы үҫтереү» программаһы сиктәрендә тормошҡа ашырылған ауыл ипотекаһының ҡалған шарттары үҙгәрешһеҙ ҡалған. 21 йәштән 75 йәшкә тиклемге рәсәйлеләр кредит алыусы була ала. Ауыл ерендә торлаҡ һатып алыу өсөн аҡса бүлеү ҡаралған. 30 меңгә тиклем кеше йәшәгән көслө тораҡ пункттарҙа шулай уҡ юридик шәхестәрҙән һәм индивидуаль эшҡыуарҙарҙан 5 ҡатлы яңы биналарҙа фатир һатып алырға мөмкин. Кредиттың минималь суммаһы — 100 мең һум, тәүге түләү 10 процент тәшкил итә, ул иң күбе 25 йылға бирелә. 3 процентлы ташламалы ставка һаҡланып ҡалған, шул уҡ ваҡытта сик буйы райондарында 0,1 процентҡа тиклем кәметелгән. Фото Башҡортостандың ауыл хужалығы министрлығы сайтынан алынды.