Әсәһе янына балалары менән ҡайтып, тороп китмәксе булған...

Яҡташыбыҙ Гөлнараның ике бәләкәй балаһы менән Мари Илендә көслө дауыл ваҡытында һәләк булыуы тураһында хәбәр иткәйнек инде. Асыҡланыуынса, уларҙы 1 августа тыуған яғы Стәрлетамаҡ районында ерләгәндәр. Ә ире, әле һаман иҫенә килмәгән, ул ауыр хәлдә реанимацияла ята. Ошо көндәрҙә ирҙең апаһы хәбәрселәр менән аралашҡан һәм түбәндәгеләрҙе әйткән. “Һуңғы тапҡыр фажиғә көнөндә иртән һөйләштек. Бер нисә көнгә генә булһа ла ял итергә ҡарар иткәйнеләр. Ҡустым крансы булып эшләй, эшенән бик китә алмай. Гөлнара ла ял итер, тип эшенән бер нисә көн һорап Ялчик күленә барырға хәл иттеләр. Ғаилә менән беренсе тапҡыр сығыуҙары ине. Кәйефтәре бик шәп ине. "Кәрәк-яраҡ алырға тип магазинға ингәйнек, хәҙер юлға сығабыҙ" тине Ринат. Ватсапҡа ҡуйған статустарын ҡарап ҡыуанып ултырғайным. Ғәрәсәт тураһында кис кенә белеп ҡалдым, телефонға яңылыҡтар ҡарайым тип ингәйнем. Унда һәләк булыусылар ҙа бар тип яҙғандар ине. Тиҙ генә Ринатҡа шылтыраттым, тик телефоны һүнгән ине. Шунан Гөлнараға шылтыраттым, уны тәүтикшереүсе алды һәм ауыр яңылыҡ тураһында әйтте”, – тигән ул. Ринат менән Гөлнара интернет аша танышҡан. Гөлнара декрет ялына киткәнсе Ҡазан кооператив институтында кадрҙар бүлегендә эшләгән. – Бер ай элек кенә ипотекаға фатир алғайнылар. Уға тиклем ҡуртымға алып йәшәнеләр. Үҙ өйҙәре булғанға ныҡ шатланғайнылар. Рәхәтен генә күрә алманылар. Киленебеҙ беҙҙе ныҡ яҡын итте, аҙна һайын ауылға ҡайтып йөрөнөләр. Гөлнара сабыр, тыныш кеше ине. Ҡыҙҙары Йәсминә менән София атайҙарына оҡшаған ине. Ҙурына – ике йәш, бәләкәй Софияға ике ай ғына ине, уны ҡайһы бер туғандар күреп тә өлгөрмәне. Гөлнара бер аҙ Башҡортостанға барып, әсәһе менән йәшәп китмәксе ине. Өлгөрмәне, кәүҙәһе генә ҡайтты. Әсәһенә Хоҙай сабырлыҡ бирһен. Беҙгә лә бик ауыр. Ринат менән берәр хәл булһа, әсәһенең йөрәге күтәрмәҫ тип ҡурҡам, – тигән Фәриҙә ханым. Ринат әле дауаханала. Уның яҡындары ул иҫән ҡалһын тип доғалар ҡыла. Ирҙең ҡатыны менән балаларының һәләк булғанын беләме-юҡмы икәнлеге билдәһеҙ, сөнки табиптар оҙаҡ килгән. Фото: социаль селтәрҙәр.