Башҡорт халҡының бынамын тигән ул-ҡыҙҙары күп. Уларҙы күрә белергә, күтәрергә, ҡанатланlырырға кәрәк. Яңыраҡ социаль селтәрҙә Красноусол башҡорт гимназия-интернаты директоры Гөлсөм Монасипова ошондай шәп башҡорт ҡыҙы менән таныштырҙы. Беҙ ҙә уның һөйлгәндәрен һеҙгә еткерергә булдыҡ. “Бөрйән тиһең дә сабаһың”, тиҙәр ҙә торалар. Сабам шул. Тәбиғәтенә ғашиҡмын. Көткән дуҫтарым, мин тип йән атҡан әхирәттәрем, матур, ихлас таныштарым бар. Бына әле бер миҙгелгә генә тыуған яҡтарына Зөлфиәм ҡайтҡан. Ағиҙелдә һыу инеп, Алағуян ярында уйнап үҫкән сая, ныҡыш, маҡсатлы, уңған башҡорт ҡыҙы Зөлфиә Юлсуринаны бында белмәгән кеше юҡтыр. Шәп блогер тип тә беләләр уны. Һөйләшеүгә ихлас, күңеле шар асыҡ әхирәтем Бөрйәндә шәхси магазиндар асып, текә эшҡыуар булып танылғайны. Башҡорт китаптарын, күңелгә ятышлы әйберҙәрҙе, балалар кейем-һалымын, заманса уйынсыҡтарҙы тик уның магазинында ғына табып була торғайны. Бөрйәндә, Өфөлә яйға һалынған бизнесына ҡуш итеп, сит илдә лә эшмәкәрлеген йәйеп ебәрҙе Зөлфиә.