“Баҫыу көнө-2023” – тәжрибә уртаҡлашыу майҙансығы

Бөгөн Көйөргәҙе районында Башҡортостан Башлығы Радий Хәбиров "Баҫыу көнө-2023" төбәк-семинар кәңәшмәһендә ҡатнашты. Бындай семинарҙар үткәреү республикала матур йолаға әүерелгән һәм, ғәҙәттәгесә, төбәктең биш климатик зоналарында урып-йыйыу кампанияһы башланыр алдынан үткәрелә. Тәүге семинар-кәңәшмә Көйөргәҙе районының Киров исемендәге хужалыҡ базаһында үтте. Сарала ауыл хужалығы тармағы белгестәре, район хакимәттәре башлыҡтары, ауыл хужалығы идаралыҡтары етәкселәре, агросәнәғәт предприятиелары һәм крәҫтиән (фермер) хужалыҡтары етәкселәре ҡатнашты. Башҡортостан Башлығы Радий Хәбиров тәү сиратта “Баҫыу көнө-2023”-тә ҡатнашҡан һәм үҙ яңылыҡтарын, техниканы тәҡдим иткән ойошмаларҙың эшмәкәрлеге менән танышып сыҡты. Алдынғы ғилми ойошмалар, үҫемлектәрҙе һаҡлау саралары һәм орлоҡ етештереүселәр үҙ эшләнмәләре менән таныштырҙы. Башҡортостан Башлығына бойҙай, борсаҡ, ужым арыш, картуф, емеш-еләк культураларының яңы төрҙәре тураһында һөйләнеләр. Республиканың 60-ҡа яҡын орлоҡ етештереү предприятиеһы орлоҡ күләмен арттырыуҙы һәм яңы сорттарҙы ғәмәлгә индереүҙе тәьмин итә. Киләсәктә мөмкин тиклем сит илдән индерелгән орлоҡто алмаштырыу бурысы тора. Төбәк бюджетынан йыл һайын элиталы орлоҡ һатып алыуға 100 миллион һум аҡса бүленә. Ауыл хужалығы ерҙәрен мелиорациялауға ҙур иғтибар бүленә. Айырыуса һуңғы йылдарҙа ҡабатланған ҡоролоҡ был эште тиҙләтергә һәм киңерәк ҡулланырға кәрәклеген дәлилләй. Республика биләмәһендә әлегә 39,8 мең гектар майҙанда барлығы 186 һуғарыу системаһы бар, тип билдәләй белгестәр. Төбәк Башлығы шулай уҡ Рәсәй һәм Белоруссияның алдынғы етештереүселәре тәҡдим иткән ауыл хужалығы техникаһын ҡараны. Башҡортостандың ауыл хужалығы министры урынбаҫары Илшат Фәзрахманов әйтеүенсә, 2023 йылда хужалыҡтар 6,7 миллиард һумлыҡ 1450 төрлө машина һатып алған да инде. Ә 2019 йылдан алып республикаға 48 миллиард һумлыҡ 14,5 мең берәмек яңы техника килгән. Артабан Радий Хәбиров сәхнәгә күтәрелде һәм ауыл хужалығы тармағы алдынғыларын тәбрикләп, дәүләт наградалары тапшырҙы. Илдең аҙыҡ-түлек хәүефһеҙлеген тәьмин итеүгә индергән өлөш өсөн рәхмәт белдерҙе, быйыл юғары уңыш теләне. - Беҙ, ғәҙәттәгесә, уңыш йыйыу кампанияһы башланыр алдынан "Баҫыу көнө" үткәрәбеҙ. Алдыбыҙҙа ниндәй бурыстар торғанын билдәләйбеҙ, һөҙөмтәләргә йомғаҡ яһайбыҙ. Былтыр беҙҙең өсөн бик уңышлы йыл булды. Биш миллион тоннанан ашыу ашлыҡ йыйҙыҡ. Быйылғы йыл еңел түгел, әммә мул уңыш йыйырбыҙ тип ышанабыҙ. Нисек кенә булмаһын, юғары күрһәткестәр артында һеҙҙең хеҙмәт тора. Республикаға етәрлек икмәк үҫтереүегеҙ өсөн рәхмәт, - тип билдәләне Радий Хәбиров. Республика Башлығы техник паркты яңыртыу темпын да юғары баһаланы. — Беҙ ауыл хужалығы техникаһын яңыртыу һәм ҡорамалдар алыу менән эҙмә-эҙлекле рәүештә шөғөлләнәбеҙ. Һуңғы биш йылда 48 миллиард һумлыҡ техника һатып алынды. Шуларҙың ете миллиарды төбәк ҡаҙнаһынан бүленгән субсидиялар иҫәбенә. Быйыл баҫыуҙарға былтырғыға ҡарағанда 150-гә күберәк комбайн инәсәк. Был уңышты тиҙ һәм юғалтыуһыҙ йыйып алырға булышлыҡ итәсәк, - тине Радий Хәбиров. Республика Башлығы игенселәргә махсус хәрби операцияла ҡатнашыусыларға ярҙам күрһәткәндәре өсөн рәхмәт белдерҙе. Ауыл хужалығы предприятиелары ярҙамында махсус хәрби операция биләмәһенә Башҡортостандан техника һәм аҙыҡ-түлек күпләп оҙатыла. — Һеҙ фронт һыҙығындағы һалдаттарыбыҙға ярҙам итеүгә ҙур өлөш индерәһегеҙ. Аҙыҡ-түлек, кәрәк-яраҡтар ебәрәһегеҙ. Быларҙың барыһы ла егеттәргә кәрәк. Бының өсөн ҙур рәхмәт! Йылына дүрт миллион тоннаға тиклем иген үҫтерергә һәләтлебеҙ. Ошо кимәлгә ынтылырға кәрәк. Әлбиттә, һауа шарттары ҡамасауламаһа, ашламалар һәм заманса технологиялар ярҙамында был һанды йылдан-йыл тотороҡло тота алабыҙ, – тине Радий Хәбиров. Һуңынан Радий Хәбиров семинар-кәңәшмәлә ҡатнашыусылар менән бергә төрлө ашлыҡ һәм майлы культуралар сәселгән тәжрибә участкаларын ҡараны. Быйыл был майҙандағы сәсеү эштәре өсөн Рәсәй ауыл хужалығы үҙәгенең Башҡортостан буйынса филиалы яуаплы ине. Рәсәй Фәндәр академияһы Федераль ғилми-тикшеренеү үҙәгенең Башҡортостан ауыл хужалығы ғилми-тикшеренеү институты директоры Әнүәр Шакирйәнов аңлатыуынса, ауыл хужалығы менән шөғөлләнгән хужалыҡтар менән улар тығыҙ хеҙмәттәшлек итә һәм төрлө культураларҙың етештереүсәнлеге, уңышы, уларҙың климат шарттарына бәйле зоналарға яраҡлылығы тураһында ышаныслы мәғлүмәттәр ала. Баҫыуҙа шулай уҡ ашламаларҙың үҫентеләрҙең үҫешенә һәм уңышына йоғонтоһо, алынған продукцияның сифаты һәм күрһәткестәре буйынса тикшеренеүҙәр үткәрелә. – Был тәжрибә майҙансығында барыһы ла бик асыҡ күренеп тора. Бындай саралар агрономдарға ниндәй уңыштың билдәле бер өлкәгә яраҡлыраҡ булыуы, баҫыу эштәренең ниндәй төрҙәрен башҡарырға кәрәклеге тураһында ҡарарҙар ҡабул итеүҙә ярҙам итә. Беҙҙең бурыс – "Баҫыу көндәре"н ойоштороу тәжрибә туплауға, хеҙмәттәштәр менән аралашып, уңыштарҙы барларға, етешһеҙлектәрҙе күрергә ярҙам итә, — тине Радий Хәбиров. Айрат Нурмөхәмәтов фотолары.