Төркиә инвесторҙары Башҡортостанды көнбағыш орлоғо гибридтарын етештереү буйынса проектты тормошҡа ашырыу өсөн майҙансыҡ итеп ҡарай, тип хәбәр иттеләр республика Хөкүмәтенең матбуғат хеҙмәтенән. Инвестиция проекты төбәктә “Халыҡ-ара кооперация һәм экспорт” милли проекты сиктәрендә тормошҡа ашырыла ала. Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрахманов Төркиә Республикаһы Фракия орлоҡсолар ассоциацияһы вәкилдәре менән осрашыуҙа билдәләүенсә, Башҡортостандың өҫтөнлөгө бар – ул тәбиғәт һәм климат, сөсө һыу һәм һуңғы 10 йылда донъяның иң яҡшы етештереүселәре тәжрибәһе ярҙамында төбәктә үҙләштерелгән технологиялар. – Һуңғы йылдарҙа игендең мөһим нигеҙ икәнлеген аңлап, был йүнәлеште үҙаллы үҫтерҙек. Игендең бөтә сорттары һәм орлоҡтары – Рәсәй, беҙҙең Башҡортостанда үҫә. Башҡортостан – Рәсәйҙә ҡарабойҙай етештереүселәрҙең береһе. Әйткәндәй, бөгөн уны Төркиәгә бик күп оҙатабыҙ. Әммә беҙҙә ҡайһы бер культураларҙың орлоҡтарына мохтажлыҡ бар. Мәҫәлән, көнбағыш. Шуға күрә үҙебеҙҙең орлоҡсолоҡто үҫтерергә ниәтләйбеҙ, был йәһәттән республикабыҙҙа орлоҡ етештереү өсөн дуҫ илдәр менән берлектәге предприятиеларға таянасаҡбыҙ. Төркиәнән коллегаларыбыҙға ышанабыҙ, улар менән йылы мөнәсәбәттәр булдырылған, – тип уртаҡлашты Илшат Фәзрахманов. Ике республика араһында уҙаҡташлыҡ көсәйә, тип белдерҙеләр осрашыуҙа. 2023 йылдың ғинуар-май айҙарында Башҡортостандың Төркиә Республикаһы менән үҙ-ара тауар әйләнеше, 2022 йылдың ошо уҡ осоро менән сағыштырғанда, 70,6 процентҡа артҡан. Шул уҡ ваҡытта экспорт 61,4 процентҡа арта, ә импорт уҙған йыл күрһәткестәре менән сағыштырғанда 2,95 тапҡырға арта. Башҡортостан менән Төркиә араһында эшлекле әүҙемлекте үҫтереүҙә республиканың Рәсәй сауҙа вәкиллеге ҡарамағындағы вәкиллеге ҙур йоғонто яһай. Был төрөк коллегалар менән тура бәйләнеш булдырырға мөмкинлек бирә. Үҙ сиратында, Фракияның орлоҡсолар ассоциацияһы вәкилдәре Башҡортостан менән уҙаҡташлыҡ мөнәсәбәттәре булдырыу һәм берлектәге етештереүҙе ойоштороу менән ҡыҙыҡһыныуҙарын белдерҙе. Шулай итеп, республикала етештерелгән орлоҡтарҙы Рәсәй баҙарына ғына түгел, Бойондороҡһоҙ Дәүләттәр Берләшмәһе һәм Азия илдәренән ҡулланыусыларға ла оҙатырға мөмкин буласаҡ. “Халыҡ-ара кооперация һәм экспорт” милли проекты (национальный проект “Международная кооперация и экспорт”) Рәсәй Президенты Владимир Путиндың май указдары буйынса ҡабул ителгән. Күләмле проекттың төп маҡсаты – 2020 йыл менән сағыштырғанда, 2030 йылға сеймал һәм энергетик булмаған тауарҙар экспортының 70 проценттан кәм булмаған ысын үҫешен тәьмин итеү. Фото: agriculture.bashkortostan.ru