Өлкән йәштәгеләр һәм инвалидтарҙы ғаиләгә ҡабул итеү буйынса закон ғәмәлгә ингәс, йәғни 2017 йылдан алып, Башҡортостанда 285 килешеү төҙөлгән. Әлеге ваҡытта республикала ошондай 114 ғаилә бар, уларҙа 115 өлкән йәштәгеләр һәм инвалидтар йәшәй. - Программа ғәмәлдә булғандан алып өлкән йәштәгеләрҙе һәм инвалидтарҙы өйөндә ҡарау йөкләмәһен алған граждандарҙы бүләкләү өсөн төбәк бюджетынан 59 миллиондан ашыу һум аҡса бүленде. Был закон стационарҙарҙы алмаштырған технологияларҙы үҫтереү өсөн ҡабул ителгән һәм ошо программа ҡарауға мохтаж кешеләрҙе интернаттарға урынлаштырыуҙың альтернативаһы булып тора, - тип белдерҙе Башҡортостан Хөкүмәте Премьер-министры Андрей Назаров. Өлкән йәштәге кешене йәки инвалидты тәрбиәгә алған ғаиләнең килеме даими ҡарауға мохтаж кешенең пенсияһын – уның 75 процентын – ай һайын күсереүҙән килгән аҡсанан хасил була. Бынан тыш, ҡараған кешегә 6200 һум күләмендә аҡса түләү ҡаралған. Әгәр ғаиләгә I төркөм инвалид йәки 80 йәштән олораҡ кеше алынһа, ай һайын түләнгән аҡса күләме 30 процентҡа – 8060 һумға тиклем – арта. Был аҡсаға - килемгә - һалым һалынмай. Республиканың ғаилә, хеҙмәт һәм халыҡты социаль яҡлау министры Ленара Иванованың һүҙҙәренә ҡарағанда, был программа - социаль хеҙмәтләндереүҙең иң һөҙөмтәле формаларының береһе. Сөнки бары ғаиләлә кеше үҙен ышаныслы тота һәм был уның сәләмәтлегенә, йәшәү сифатына, тимәк, ғүмер оҙайлылығына ыңғай йоғонто яһай. - Бындай кешеләрҙе ғаиләгә ҡабул итеү, дөйөм алғанда, ғәҙәти йәшәү сифатын, рәүешен һаҡлау мөмкинлеге. Шуға ошондай ғаиләләрҙе ойоштороу йәһәтенән әүҙем эшләргә кәрәк, - тине Андрей Назаров. Оло кешене йәки инвалидты ғаиләһенә алырға теләгәндәр ҡаланың йәки райондың социаль учстковыйына мөрәжәғәт итергә тейеш. Был хаҡта тулыраҡ: ttp://rcson.mintrudrb.ru/posts/204348. Тағы барлыҡ һорауҙар менән Республика халыҡты социаль хеҙмәтләндереү үҙәгенең “ҡыҙыу элемтәһе”нә мөрәжәғәт итергә мөмкин:8-800-775-00-14. Сығанаҡ: mintrud.bashkortostan.ru