Белорет районының Собханғол (халыҡ телендә - Урман Рәүәте) ауылында бына 46 йыл инде бер үҙе генә донъя көткән Кинйәғол Сәлимгәрәевте хәҙер республикала ла яҡшы беләләр. Уны Өфөлә йәшәгән яҡташтары ла онотмай – ошо көндәрҙә Белорет районының баш ҡалалағы “Артыш” йәмәғәт ойошмаһы етәксеһе, Рәсәйҙең атҡаҙанған мәҙәниәт хеҙмәткәре Рәйес Исмәғилев, филология фәндәре кандидаты, БДПУ доценты Зәки Әлибаев, Башҡортостандың атҡаҙанған артисы Искәндәр Ғәзизов, Башҡортостандың атҡаҙанған мәҙәниәт хеҙмәткәре Ранис Алтынбаев, Мәжит Ғафури исемендәге Башҡорт дәүләт академия драма театры режиссеры, актер Фирғәт Ғарипов һәм уларҙың ғаиләләре Кинйәғол олатайҙы 90 йәшлек юбилейы менән ҡотлап, бүләктәр тапшырып, концерт ҡуйҙылар. Шулай уҡ улар "Юлдаш" каналы етәкселегенең дә бүләген - радио - тапшырҙы. Район хакимиәте башлығы Андрей Иванюта ла Ҡотлау хаты һәм бүләк ебәргән. Ә бына Кинйәғол олатай 90 йәштә лә бирешмәй, яңғыҙым тип ҡайғырып ултырмай, хатта йортон да яңыртырға булған. Әле өй бураһын күтәреп бөткәндәр, ҡышҡа тиклем йорт туйларға ла иҫәптәре бар. Уға был эштә Инйәрҙә йәшәгән ағаһының улы Хәлим һәм Уҫманғәленән төҙөүселәр – Фәрит Исламов, Хәбир Шәрәфетдинов, Ринат Сәғәҙәтуллин ярҙам итә. Яҡташтарыбыҙ көҙөн дә Кинйәғол олатай эргәһенә барып, ҡышҡылыҡҡа кәрәкле әйберҙәр тапшырырға уйлай. Кинйәғол Сәлимгәрәев тыуған ауылына тоғро ҡалып, инде 50 йылға яҡын нигеҙен һыуытмай донъя көтә. Уны "Башҡорт Робинзоны" тип тә йөрөтәләр. Әйткәндәй, был ауылға барып етеүе еңелдән түгел, "УАЗ" кеүек юлһыҙ урындарҙан йөрөй торған автомобилдәр генә үтә ала. Фото "Бәйләнештә"ге белореттар төркөмөнән.