"Ҡыуандырып ҡайтып инербеҙ"

Бөгөн Башҡортостандың хәрби комиссариатынан Миңлеғәле Шайморатов исемендәге башҡорт батальонында хеҙмәт итәсәк ир-егеттәрҙе махсус хәрби операцияһы биләмәһенә оҙаттылар. Йәмғеһе 40 кеше Рәсәйҙең Оборона министрлығы менән килешеү төҙөп, Ростов өлкәһенә юлланды. Яҙмышын хәрби хеҙмәт менән бәйләргә теләгән ир-егеттәр военкоматҡа иртәнсәк килде. Бында уларҙы көтәләр ине. Медицина комиссияһын улар йәшәгән ерендә үтһә лә, комиссариатта табип менән шәфҡәт туташы һәр береһен ҡарап, анализдар алды. Артабан уларға обмундирование һәм ҡоро паек бирҙеләр. Документтарға бәйле эште теүәлләнеләр. Бөгөн махсус рәүештә социаль яҡлау органдары хеҙмәткәрҙәре һәм Башҡортостан буйынса суд приставтары хеҙмәте идаралығы белгестәре ҡабул итеү ойошторҙо. Һорауҙары булғандар консультация алды, ғаризалар тултырҙы, кредит мәсьәләрен хәл итеп ҡуйҙы. Был алым хәрбиҙәр өсөн уңайлы: бар эштәрҙе бер урында, ашыҡмай атҡарып ҡуйыу күңел тыныслығы бирә. Башҡортостан хәрби комиссариатының бүлек етәксеһе Сергей Родинко билдәләүенсә, контракт хеҙмәтенә 18 йәштән 60 йәшкә тиклемгеләр, һаулыҡтары яҡшы булғандар алына. Килешеү буйынса хеҙмәткә барырға теләүселәр бар. - Егеттәр Ростов өлкәһенә юллана. Күпмелер ваҡыт улар хәрби әҙерлек үтәсәк. Әлбиттә, килешеү төҙөү һәм махсус хәрби операция биләмәһенә юлланыу ҡарарын ҡабул итеү һәр кемгә лә еңел бирелмәгәндер. Шулай ҙа күптәрҙең илһөйәрлек тойғоһо көслө булыуын билдәләп үтергә кәрәк. Айырыуса, быға тиклем хәрби хеҙмәт үтеп, һалдат һурпаһын эскән егеттәр был ҡарарҙы ҡабул итә. Ил именлеге өсөн борсолоп китә улар. Башҡортостан Башлығы Радий Хәбировтың башланғысы менән республикала төҙөлгән исемле батальондарға эләгергә теләүселәр күп. Уларға хәрбиҙәр һайлап алына. Һаулығына, хәрби әҙерлегенә ныҡлы ҡарайбыҙ. Икенсе ерҙәргә хеҙмәт итергә китергә теләүселәр ҙә бар, - тип һөйләне подполковник Сергей Родинко. Башҡортостан хәрби комиссариат вәкиленең һүҙҙәрен килешеү төҙөп, махсус хәрби операция биләмәһенә юлланырға йыйынған ир-егеттәр ҙә ҡеүәтләй. Мәҫәлән, Ишембай районынан Азамат бер йылға килешеү төҙөгән. Быға тиклем контракт буйынса хәрби бәрелештәр барған ерҙә хеҙмәт иткән булған. - Таныштар, тиҫтерҙәр шунда. Мин дә уларға ярҙамға барырға булдым. Әлбиттә, ата-әсәйҙәр, ғаилә риза булманы. Яйлап күндерҙем, ҡарарымды ҡабул итеп, хөрмәтләп оҙаттылар. Ҡатыным эйәреп килде. Иламаҫҡа ҡуштым! Балаларға вахта менән эшкә киттем тип әйттем. Улар артыҡ борсолмаһын тигән ҡараштамын. Әлбиттә, һуғыш барған ергә китеүе еңел түгел, әммә ил именлеге өсөн көрәшәбеҙ. Ундағы егеттәр менән һөйләшеп торабыҙ. Шарттар һәйбәт. Миңлеғәле Шайморатов исемендәге батальонда хеҙмәт итергә теләйем тип тәүҙән үк әйттем. Тәү сиратта беҙҙең милли геройыбыҙ ул. Икенсе яҡтан, батальонда республиканан алынған егеттәр. Үҙебеҙҙекеләр менән иңгә иң терәп тороуы еңелерәк булыр тип ышанам, - ти Азамат. Бүздәк районынан Артур 2007-2009 йылдарҙа Краснодар крайында хеҙмәт иткән. - Ике балам бар. “Ашығыс ярҙам” машинаһы водителе булып эшләнем. Махсус хәрби операция биләмәһендә лә руль артында булырмын тип уйлайым. Бер йылға килешеү төҙөнөм, ярты йылдан балаларҙы ҡыуандырып, ялға ҡайтырмын тип өмөтләнәм, - ти ул. Һалдаттар Ростов өлкәһенә тиклем уңайлы, ҙур “Башавтотранс” атвобусында юлланды. Ике водитель алмашлап алып барасаҡ. Уларҙың береһе оҙаҡ йылдар 3-сө УПАТП-ла эшләгән тәжрибәле водитель Йәмил Һамарбаев. - Айына бер-ике тапҡыр ул яҡтарға эш менән барам. Махсус хәрби операция биләмәһенә ун мәртәбә барып ҡайттым инде. Юлды һәйбәт беләм. Килешеү төҙөгән егеттәрҙе илтеп, ялға ҡайтырға йыйынғандарҙы алып ҡайтырға тейешбеҙ, - тине ул. (Егеттәрҙең исем-шәрифтәре үҙгәртеп алынды). Автор фотолары.