Быйыл 23 июлдән 2 авгусҡа тиклем Өфөлә беренсе тапҡыр “Беҙ бергә. Спорт” йәйге Сурдлимпия уйындары үткәрелә. Әле сараға әҙерлек тулыһынса бара. 18 июлдә Башҡортостан Хөкүмәтендә Премьер-министр Андрей Назаров рәйеслегендәге кәңәшмәлә һүҙ тап ошо хаҡта барҙы. Был хоҡуҡ Башҡортостанға бирелде Премьер-министр республикабыҙҙың Рәсәйҙәге алдынғы спорт төбәктәренең береһе икәнлеген әйтте. Шуға ла Башҡортостанға йәйге сурдлимпия уйындарын үткәреү хоҡуғы бирелде. Был ҡарар Петербург халыҡ-ара иҡтисади форумында ҡабул ителде һәм унда өс яҡлы килешеүгә ҡул ҡуйылды. – Сурдлимпия уйындары, Олимпия һәм Паралимпия уйындары менән бер рәттән, иң абруйлы халыҡ-ара спорт сараларының береһе. Алдыбыҙҙа – бай программа һәм үтәргә тейешле күп мәсьәләләр. Өс меңдән ашыу ҡатнашыусы һәм өс меңгә тиклем көйәрмән килер тип көтөлә, – тине Андрей Назаров. – Рәсәй Спорт министрлығы менән берлектә консолидацияланған смета булдырылған. Дөйөм аҡса күләме – 334 миллион, шул иҫәптән федераль бюджеттан – 292 миллион, республика бюджетынан 42 миллион һум бүленде. Сараға әҙерлек тураһында ентекләберәк республиканың спорт министры Руслан Хәбибов һөйләне. Уның әйтеүенсә, һаңғырауҙар араһында ярыштар спорттың 21 төрө (бадминтон, гандбол, баскетбол, еңел атлетика, өҫтәл теннисы, йөҙөү, маунтинбайк велосипед спорты, шоссе велосипед спорты, атыу, спорт ориентирлауы, волейбол, каратэ, тхэквондо, футбол, ирекле көрәш, грек-рим көрәше, дзюдо, самбо, теннис, пляж волейболы, боулинг) буйынса үткәрелә. Шулай уҡ Рәсәйҙең икенсе командаһының ҡатнашыуы тураһындағы мәсьәлә лә хәл ителә. Сурдлимпия уйындары 18 спорт ҡоролмаһында һәм объектында үткәрелә. Әйткәндәй, 12-13 апрелдә объекттар тикшерелде. Һөҙөмтәлә улар комиссия тарафынан донъяуи сараны үткәреү өсөн килешелеп, раҫланғайны. Спорт ҡоролмаларының әҙерлеге йәнә тикшерелә, шулай уҡ сараны үткәргәндә хәүефһеҙлекте тәьмин итеү йәһәтенән профилле ведомстволар менән хеҙмәттәшлек ителә. Башҡортостан Һаулыҡ һаҡлау министрлығы менән берлектә дауалау-эвакуациялау һәм медицина тәьмин ителеше буйынса пландар ҡоролған. Сарала ҡатнашыусыларҙы 15 медицина ойошмаһы хеҙмәтләндерәсәк. “Роспотребнадзор”ҙың Башҡортостан буйынса идаралығы хеҙмәткәрҙәре менән сурдлимпия уйындары ваҡытында санитар-эпидемиологик хәлде тәьмин итеү йәһәтенән әүҙем килешелгән. Спорт объекттары ярыштарға әҙер Өфөгә 30-ҙан ашыу илдән спортсылар килер тип көтөлә. Рәсәйҙең йыйылма командаһында иһә 495 вәкил. Судьялар бригадалары ла тупланған. Объекттарҙы һәм ҡоролмаларҙы биҙәүҙең берҙәм стиле уйлап сығарылған. Сурдлимпия уйындарының логотибы һәм билдәһе булдырылған. Ирекмәндәрҙе туплау эше лә атҡарылған. Уларҙың дөйөм һаны – 300, 100-өн Рәсәйҙең Һаңғырауҙар спорт федерацияһы тәҡдим иткән, 200-ө – Өфө кешеләре. Уларҙың 110-ы ым-ишара телен белә. Сурдолог-тәржемәселәр билдәләнгән. Руслан Хәбибов әйтеүенсә, әҙерлек эше дауам итә. Бөтә Рәсәй һаңғырауҙар йәмғиәтенең төбәк бүлексәһе менән берлектә сарала ҡатнашыусылар һәм ҡунаҡтар өсөн мәҙәни программа әҙерләнә. Кәңәшмәгә һығымта яһап, Хөкүмәт Премьер-министры Андрей Назаров Эшҡыуарлыҡ һәм туризм министрлығына Мәҙәниәт министрлығы менән берлектә ошо мәсьәләне хәл итергә ҡушты. Сауҙа һәм хеҙмәттәр министрлығына сара ваҡытында сувенир әйберҙәре һатыуҙы ойоштороу йөкмәтелде. Ә Спорт министрлығы ярыштар үтәсәк барлыҡ спорт ҡоролмаларына әҙерлек йәһәтенән ахырғы тикшереүҙе үткәрергә тейеш. – Ярыштарҙың халыҡ-ара статуслы булыуы республикаға уларҙы үткәреү буйынса ҙур яуаплылыҡ өҫтәй. Уларҙы юғары кимәлдә ойоштороу өсөн күп көс һалырға кәрәк, – тине Андрей Назаров. Сығанаҡ: pravitelstvorb.ru