"Минең донъям зәңгәр, шундай зәңгәр..."

Бөгөн шағирә, журналист, Башҡортостан һәм Рәсәй Яҙыусылар союзы ағзаһы, Рәми Ғарипов, Ҡайғусуз Абдал халыҡ-ара премиялар лауреаты Гөлнара Хәлфетдинованың күркәм юбилейы. Тыуған көнөң ҡотло булһын, шағирә! * * * Тәүәккәллек бирсе миңә, көнөм, Бөгөнөмдә бәхетле булырға, Үҙ-үҙемдән ҡасып йөрөмәҫкә, Үҙ-үҙемә шыпа тулырға. Ҡыйыулыҡтар бирсе миңә, яҙмыш, Дуҫ булырға ысынбарлыҡ менән. Хистәремә тоғро ҡалдыр, әммә, Күҙ бәйләтмәй йәшәт, тип үтенәм! Тыныслыҡтар бирсе миңә, хыял, Гел йүгертмә, килсе ҡаршыма! Ысын икәненә ышанғанда Мин ҡоларға әҙер шаршыңа! * * * Минең донъям зәңгәр, шундай зәңгәр, Сит-ситтәре ап-аҡ уҡалы. Сиңерткәләр йырлай, әйтерһең дә, Сың-сың килә ҡыҙҙар һаҡалы. Сың-сың килә ҡашмау тәңкәләре, Эй, күңелле, килә бейеге. Күҙәтәһең ошо хозурлыҡты Ҡулдарыңа ҡуйып эйәгең. Минең донъям зәңгәр, зәңгәр генә, Иркенлектән башың әйләнә. Ҡолап китмә тиеп, ҡулдарымды, Ҡулдарымды зинһар, бәйләмә. Минең донъям зәңгәр, зәңгәр генә, Аҡ уҡалы уның ситтәре. Ул уҡалар - минең ҡанаттарым, Түгел улар донъя сиктәре. * * * ХЫЯЛДАРЫМ КИТТЕ ХАҠЛЫ ЯЛҒА Хыялдарым китте хаҡлы ялға, Ҡанаттарын һалып һандыҡҡа. "Етәр инде, күпме талпындыҡ та, Етәрлеген инде яндыҡ та... Беҙ диңгеҙгә хәҙер юлланабыҙ, Хаҡын сығарырға хаҡлы ялдың. (Әллә алдарына килә инде Теләгәне иркә хыялдың?) Бойороҡҡа хәҙер буйһонмайбыҙ, Эш көндәрен башҡа һанама", - Тип өйөлөп, бер-бер артлы ғына Тейәлделәр былар санама. "Бик теләһәң, үҙең һөйрә хәҙер, Ҡалдырһаң да ҡалдыр, үлмәҫбеҙ. Был яғына һинең күңел өсөн Көлкө килмәгәндә көлмәҫбеҙ. Осҡо килмәгәндә беҙ осмаҫбыҙ, Боҫҡо килмәгәндә боҫмаҫбыҙ. Үҙ көнөңдө үҙең күр һин хәҙер, Беҙме, хәҙер беҙ бик бошмаҫбыҙ. Хыялдарым китте хаҡлы ялға, Ҡанаттарын йыуа микән тулҡын? Һөйрәмәйем, һау булығыҙ тинем, Йөрәгемде өттө ут-ялҡын! Ныҡышманым, инәлмәнем берҙә, Ҡыланмағанса һис ғүмерҙә... Осмайбыҙ тип торғас. Ярай, диңгеҙ Өйрәтер бәлки һеҙҙе йөҙөргә. Фото Г. Хәлфетдинованың шәхси архивынан.