Беҙҙән – 83 идея

Бөтә Рәсәй “Яңы заман өсөн көслө идеялар” форумының төбәк этабы тамамланды, “Торатау” конгресс-холында ошо форумға арналған иң яҡшы проекттарҙың күрһәтелеүе тураһында гәзитебеҙҙә хәбәр иткәйнек инде. Уның төп финал конкурсы 19 июлдә Мәскәүҙә уҙҙы. Стратегик башланғыстар агентлығы һәм “Росконгресс” фонды хәбәр итеүенсә, ил буйынса был форумға 24 меңдән ашыу тәҡдим йыйылған. Улар араһынан эксперттар иң перспективалы тип табылған 1000 идеяны һайлап аласаҡ. Был проекттар илдең социаль-иҡтисади үҫешенә һиҙелерлек ыңғай үҙгәреш индерәсәк. Ошо тупланмала Башҡортостандан 83 идея бар: 5 – “Кадрҙар буйынса милли башланғыстар” йүнәлеше буйынса; 18 – “Милли экологик башланғыстар” йүнәлеше буйынса; 5 – “Һанлы сервистар” йүнәлеше буйынса; 17 – “Милли технологик башланғыстар” йүнәлеше буйынса; 32 – “Милли социаль башланғыстар” йүнәлеше буйынса; 6 – “Эшҡыуарлыҡ” йүнәлеше буйынса. Был проекттар араһында айырыуса нимәләр күҙгә ташлана? Башҡортостан әүҙемселәре, мәҫәлән, хеҙмәт династияларын популярлаштырыу буйынса интерактив платформа, халыҡ кәсептәренең кадрҙар ҡеүәтен үҫтереү өсөн һөнәрселек коворкингтары, ҡала ҡоштары атласы, машинала өйрәтеү алымдары нигеҙендә компонент-ара ҡушылмаларҙың составын ана­лизлауҙы программа менән тәьмин итеүҙе, газогидраттар сығарыу нигеҙҙәрен, медицина ҡал­дыҡтарын үҙәкләштерелгән зарарһыҙландырыу системаһын, “Үҙебеҙ өсөн тегәбеҙ – махсус хәр­би операция өсөн тегәбеҙ” проекты буйынса махсус хәрби операция яугирҙәренә ярҙам ойоштороуҙы, традицион спорт уйындары үткәреүҙе һәм башҡаларҙы тәҡдим итә. Артабан Стратегик башланғыстар агентлығы иң яҡшы 100 идеяны һайлап аласаҡ һәм шуларҙың бер тиҫтәһенә Рәсәй Президенты ҡатнашлығында исем туйы үткәреләсәк. Быйыл Ойоштороу комитеты беренсе тапҡыр ошондай идеялар авторҙарына финанс ярҙамы күрһәтергә ҡарар итте. “ТОП-10” тупланмаһына ингән финалсылар – бишәр миллион, артабанғы 50 идея берәр миллион һум аласаҡ. – Форумдың төп идеяһы – граждандарҙы илдең иҡтисади үҫеше мәсьәләләрен хәл итеүгә ылыҡтырыу, – тине Башҡортостан Хөкүмәте Премьер-министрының беренсе урынбаҫары – иҡтисади үҫеш һәм инвестиция сәйәсәте министры Рөстәм Моратов. – Улар – һаулыҡ һаҡлау, демография, технологик һәм кадрҙар суверенитеты. Башҡортостан кешеһе биргән һәр идея үҙ ҡалаһын, районын, тимәк, беҙҙең республиканы һәм тотош илде үҫтереүгә йүнәлтелгән. Был сарала бөтә төбәктәр ҙә әүҙемлек күрһәтеүгә ҡарамаҫтан, беҙ идеяларҙы форумдың краудплатформаһына урынлаштырыу буйынса лидерҙар исемлегенә инә алдыҡ. Бынан тыш, 83 идея “ТОП-1000” тупланмаһына индерелде. Был бик һәйбәт һөҙөмтә. Башланғыстарға Стратегик башланғыстар агентлығы эксперттарының иғтибар итеүе һәм федераль кимәлгә сығарыуы – беҙҙең өсөн ҡыуаныслы хәл. Белешмә өсөн: Көслө идеялар форумы быйыл өсөнсө тапҡыр үткәрелә. Рәсәй Прези­дентының 2022 йылдың 9 декабрендәге Указына ярашлы, ул йыл һайын уҙғарылырға тейешле саралар исемлегенә индерелде. Башҡортостандан форумда ҡатнашыу өсөн 2,2 мең идея йыйылды, был күрһәткес буйынса беҙҙең республика Рәсәй төбәктәре араһында лидерҙар рәтендә, ә ҡатнашыусылар һаны буйынса (1,7 мең кеше) республика Мәскәүҙән ҡала икенсе урынға сыҡты. Рәшит КӘЛИМУЛЛИН