Эште иртә башлайҙар

Рәсәйҙең онлайн-рекрутинг буйынса иң ҙуры булған “һһ.ru” платформаһы Башҡортостан кешеләре араһында уларҙың нисә йәштә беренсе тапҡыр эшкә урынлашыуы тураһында һорау алыу үткәрҙе. Яуап биргәндәрҙең 53 проценты тәүге тапҡыр эшкә 17 йәштә һәм унан да иртәрәк сыҡҡаны хаҡында әйткән. Тағы ла 47 проценты 18 – 25 йәштә эш башлаған икән. Хеҙмәт юлының иртә башланыуы менән күбеһенсә сәнғәт, киң мәғлүмәт саралары, туризм һәм ҡунаҡха­налар даирәһенә ҡарағандар маҡтана ала. Яуап биреүҙә ҡатнашыусылар 18 йәшкә саҡлы эшкә сығыуҙың сәбәбе итеп финанс бойондо­роҡһоҙлоғона ынтылыуҙы бил­дәләгән. Бынан тыш, иртә эшкә сыҡҡандарҙың 35 проценты тә­ғәйен маҡсат өсөн аҡса йыйыуҙы планлаштырған. Ә 31 проценты шәхси ваҡытын шулай файҙалы үткәрергә тырышҡан, 20 проценты – ата-әсәһенә ярҙам итеү, 14 проценты үҙен ҡарау мохтаж­лығы менән эш эҙләгән. Дүрт проценты – ата-әсәһенең ҡушы­уы буйынса. 18 йәшкә тиклем үк хеҙмәт юлын башлауҙың өҫтөнлөгө итеп Башҡортостан кешеләре шулар­ҙы атаған: кеҫәңдә үҙ аҡсаң булыуы (яуап биргәндәрҙең 67 проценты), үҙаллылыҡ һәм яуаплы­лыҡ тойғоһон үҫтереү (63 проценты), ысын тормош тәжрибәһе туплау һәм билдәле бер маҡсат­ҡа аҡса йыйыу мөмкинлеге (56-шар процент), яңы һөнәргә өй­рәнеү (53 проценты). Бынан тыш, яуап биргәндәрҙең 47 проценты бөгөнгө шөғөлөнөң киләсәккә һөнәр һайлауҙы асыҡларға ярҙам итеүен дә билдәләгән. Шул уҡ ваҡытта был һорау алыуҙа ҡатнашҡандарҙың 12 проценты ғына 18 йәшкә саҡлы эш башлауҙың кәмселектәре булмауы тураһында әйткән. Ҡалғандары араһында 56 проценты эш менән уҡыуҙы аралаштырып барыуҙың ҡыйынға тура килеүе, 53 проценты ойошма етәкселәренең хаҡты ололар­ҙан кәмерәк бирергә тырышыуы, 49 проценты бәлиғ булмаған­дарҙың эш хаҡы үтә түбәнлеген, 37 проценты иртә башлауҙың мәктәптә уҡыуға насар тәьҫир итеүен йәки дәрескә йөрөүҙе бөтөнләй ташларға мәжбүр итеүен билдәләгән. Ә 33 проценты үҫмер саҡта эшләүҙең хәүефле булыуы тураһында әйткән. Рәшит КӘЛИМУЛЛИН