Бөгөн “Беҙ бергә. Спорт” йәйге Сурдлимпия уйындарының теннис буйынса һайлап алыу ярыштары барышын ҡараған көйәрмәндәр араһында Рәсәй Геройы, илдең 113-сө космонавты, 125 тәүлек, 00 сәғәт, 50 минут ваҡытын космоста үткәргән Сергей Ревинды осраттым. Ул берҙән-бер улы Ярослав менән Өфөгә килгән. Ярослав сурдлимпиада уйындарында икенсе тапҡыр ҡатнаша. "Мин 2006 йылдан теннис менән мауығам. Мәскәүҙә һаңғырауҙар өсөн ҡулайлаштырылған спорт үҙәгендә шөғөлләнәм. 2017 йылда Төркиәлә үткән сурдлимпиада уйындарында 4-се урын алдым. Көн эҫе булды. 35 градус эҫелә уйнаныҡ. Тын етмәүе сәбәпле, еңеүгә бер аҙым ҡалғас, төшөп ҡалдым. Ныҡ үкенесле булды. Был юлы һауа торошо һәйбәт. Иртәгә Израилдән килгән спортсы менән ярышасаҡмын. Уның нисек уйнағанын бөгөн ҡарап ҡуйҙым. Еңеүгә өмөт бар", - ти Ярослав. Улы Ярослав күнекмәләрҙә булған арала Сергей Ревин Дәүләкән районындағы Аэрокосмик мәктәптә балалар менән осрашып өлгөргән. "Улым менән Башҡортостанда күп тапҡыр булдыҡ. “Яҡтыкүл”, “Янғантау” шифаханаларында ял иттек. Был юлы мин Өфөлә Теннис буйынса сурдлимпиада уйындарының йыйылма командаһының попечителлек советы рәйесе булараҡ сығыш яһайым. Һаулыҡ буйынса мөмкинлектәре сикләнгән балаларға ярҙам ҡулы һуҙырға тырышам, бағыусылар эҙләйем. Егеттәр һәм ҡыҙҙар тырышып, алдына яңы маҡсаттар ҡуйып спорт менән шөғөлләнә, уларға өлкәндәр тарафынан ярҙам кәрәк", - ти Сергей Ревин. Автор фотоһы.