“Һаулыҡ һаҡлау” милли проектына ярашлы, Ишембай районында ремонттан һуң Ҡыяуыҡ фельдшер-акушерлыҡ пункты асылды. Элек ул ауыл клубы менән күршеләш һәм авария хәлендә булған, заманса шарттарға яуап бирмәгән. Ауыл Советында уны башҡа бинаға күсерергә ҡарар итәләр, ремонт-тергеҙеү эштәрен башҡаралар. Эске электр, йылылыҡ, һыу менән тәьмин итеү инженер системалары үткәрелә, биләмә төҙөкләндерелә. Яңы пунктта пациенттар өсөн бөтә уңайлыҡтар тыуҙырылған, яңы йыһаздар, заманса ҡорамалдар урынлаштырылған. – Ауылда сифатлы, заманса медицина ярҙамы ойошторолдо. Кешеләр хәҙер район дауаханаларына юлланмай, йорттары эргәһендә тәүге медицина ярҙамын алыу мөмкинлегенә эйә. Бина бөтә санитар шарттарға яуап бирә, – тип билдәләне Ишембай үҙәк район дауаханаһының баш табибы вазифаһын башҡарыусы Ринат Ғәйнетдинов. Фельдшер-акушерлыҡ пункты 109 кеше йәшәгән Ҡыяуыҡ, Михайловка, Екатериновка ауылдары халҡын хеҙмәтләндерәсәк. Медицина пункты шулай уҡ фармацевтика эшмәкәрлеген башҡарыуға лицензия алған, тимәк, ауыл халҡы дарыуҙарҙы фельдшерҙан алыу мөмкинлегенә эйә. Рәсәй Президенты Владимир Путиндың май указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен (100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына (национальный проект “Здравоохранение”) ярашлы, инновациялы медицина технологияларын, шул иҫәптән пациенттың сәләмәтлегенә иртә диагностика һәм дистанцияла мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстар. Фото: Һаулыҡ һаҡлау министрлығы.