Бөгөн балалар тәүге аҙымдарын яһарға һәм һөйләшергә өйрәнмәҫтән элек ата-әсәһенең планшеты, смартфондары менән ҡыҙыҡһына башлай. Әлбиттә, бындай өлгөргәнлек баланың үҫешендә һәм күҙ торошонда сағылмай ҡалмай. Бүздәк үҙәк район дауаханаһының табип-офтальмологы Әҙип Әнис улы Хәмәҙуллин ”Бүздәк яңылыҡтары” гәзитендә гаджеттарҙың баланың күҙҙәренә тәьҫирен кәметеү тураһында ябай, әммә һәр кемгә мөһим кәңәштәр биргән. “Баланың күҙҙәрен һаҡлауҙың иң тәьҫирле ысулы – ике-өс йәшкә тиклем гаджеттарҙы файҙаланыуҙы тыйыу. Был әйберҙәрҙән улар өсөн бер ниндәй файҙа ла юҡ, ә күҙҙәренә зыян тейәсәк. Балағыҙ беренсе класҡа күҙлек кеймәй уҡырға барһын өсөн бер нисә кәңәште үтәү ҙә етә. Әгәр балағыҙға өс-дүрт йәш бар икән һәм ул гаджеттан бик ныҡ файҙаланырға теләһә, экран уның күҙҙәренән 15-30 сантиметр алыҫлыҡта булырға тейеш. Был экрандың зарарлы тәьҫирен формалашып ҡына килгән күреү системаһына йоғонтоһон кәметергә ярҙам итәсәк. Ваҡытты ҡәтғи билдәләгеҙ, ул сикләнгән булырға тейеш. Әгәр бала уйнарға теләһә, персональ компьютерҙа йәки ноутбукта уйнаһын. Смартфондың бәләкәй экранында тиҙ ҡабатланып тороусы һүрәттәр һәм күренештәр күҙҙәрҙе нығыраҡ боҙа. Ниндәйҙер гаджет һатып алғанда ҙурыраҡ экранлыһын һайлағыҙ. Аппаратҡа ҙур шрифттар һәм иконкалар урынлаштырығыҙ. Дисплейҙың яҡтылығы үтә көслө булмаһын. Тағы бер кәңәш: электрониканы ҡараңғы бүлмәлә файҙаланмағыҙ һәм күҙҙәр өсөн даими гимнастика яһағыҙ”. Ирина Кинйәкәева фотоһы.