14-15 июлдә Учалы районының Ҡотой ауылында «Олотау йыйыны» мини-футбол фестивале үтте, ул Рәсәй спорт мастеры Ғайсар Хәлидар улы Ғәлин иҫтәлегенә бағышланды. Быйыл сара бишенсе тапҡыр уҙғарылды. 14 июлдә төркөм этабы матчтары үтһә, 15 июлдә – плей-офф матчтары. Мәғлүм булыуынса, быйыл «Олотау йыйыны» проекты «Рәсәй — футбол иле!» конкурсының төбәк этабында еңеү яуланы. Рәсәй футбол союзы (РФС) президенты Александр Дюков әйтеүенсә, «Рәсәй — футбол иле!» бәйгеһенең өсөнсө миҙгеле бик күп яңы сағыу проекттарҙы асҡан. «Урындағы футбол башланғыстарын күрһәтеү бик мөһим, сөнки был кешеләрҙе төбәктәрҙә футбол башланғыстарын тормошҡа ашырыуға дәртләндерә. Өсөнсө миҙгел проекттарында Рәсәйҙең 74 төбәгенән йәмғеһе 403 мең кеше йәлеп ителгән», - тип билдәләгән ул. "Олотау йыйыны" турниры "Футболда иң дәррәү проект” (“Лучший массовый проект в футболе") номинацияһында еңеүсе булған. Фестивалдең программаһына килгәндә, ул төрлө яҡлы һәм мауыҡтырғыс ине. Сара ҡунаҡтары үҙҙәрен төрлө бәйгеләрҙә һынап ҡарау менән бер рәттән, аттракциондарҙа күңел асҡан, оҫталыҡ дәрестәре уҙған. Атап әйткәндә, сәмлеләр үҙҙәрен башҡорт биатлоны, уҡ атыу, таҫыллыҡҡа һуғыу, армрестлинг, масс-рестлинг, гер этәреү, тауға йүгереү һәм башҡа ярыштарҙа һынаған. Икенсе көндө, плей-офф һәм киберфутбол матчтарынан һуң, ат сабышы уҙған. Шулай уҡ «Олотау йыйыны» фестиваленең ҡатын-ҡыҙҙар командалары араһында үткән “Футбол әсәйҙәре” дуҫтар матчы ла ифрат мауыҡтырғыс булған. Еңеүселәрҙе ҡотлағандан һуң, турнирҙа ҡатнашыусылар һәм ҡунаҡтар таңға тиклем дәртле дискотекала күңел асҡан. Шулай итеп, турнир һөҙөмтәләре буйынса Рәсәй спорт мастеры Ғайсар Хәлидар улы Ғәлин иҫтәлеген бағышланған V «Олотау йыйыны» мини-футбол буйынса фестиваль чемпионы исемен Әбйәлил районының Асҡар ауылы командаһы яуланы. Турнирҙың көмөш призерҙары – Ғафури районы Аҡташ ауылы командаһы. Бронза миҙалдарҙы Һамар өлкәһенән килгән ҡунаҡтар, Ырғыҙлы ауылы командаһы футболсылары алды. Дөйөм алғанда, турнирҙа илдең дүрт төбәгенән 32 команда ҡатнашты. Еңеүселәргә башҡорт тоҡомло ат һәм күсмә эксклюзив кубок тапшырылды. Сараны ойоштороусыларҙың береһе Линар Ғәлин әйтеүенсә, фестиваль бер тынала, берҙәм һәм ҙур ойошҡанлыҡ менән үткән, дуҫлыҡ һәм берҙәмлек рухы менән һуғарылған. Бөтә донъя башҡорттары ҡоролтайы милли рухты һаҡлаған, йәш быуынды спортҡа ылыҡтырған, сәләмәт тормош рәүешен пропагандалаған өсөн бер төркөм ойоштороусыларҙы билдәләп үтте. Ойошманың рәйесе Юлдаш Йосопов Ильяс Фәйзуллин, Илнур Солтанов, Таһир Мәхмүтов, Булат Сафин, Азат Сафин, Азалия Яхина кеүек әүҙем ойоштороусыларға рәхмәт хаттары тапшырҙы. Фото: “Говорит и показывает Учалы”, “Олотау йыйыны” төркөмдәренән.