Бөгөн төндә, 13 июлдә, Башҡортостандың Күгәрсен районында 20 йәшлек ҡыҙ юл фажиғәһендә һәләк булған. Был ваҡиға тураһында республиканың ЮХХДИ идаралығы етәксеһе Владимир Севастьянов үҙенең Telegram-каналында хәбәр итте. Фажиғә Воскресенск ауылында була. Күрше ауылдан 17 йәшлек үҫмер “Lada Priora” автомобилендә юлдың һул яғында китеп барған йәйәүле ҡыҙҙы бәрҙерә. Зыян күреүсе ауыр йәрәхәттәр алып, ашығыс ярҙам килгәнсе үк һәләк була. ЮХХДИ хеҙмәткәрҙәре бәлиғ булмағандың водителдең таныҡлығы юҡлығын асыҡлаған. Етмәһә, ул рулгә иҫерек килеш ултырған. Медицина тикшереүе ваҡытында алкостестер һулаған һауала 0,403 мг/л этанол парҙары булыуын күрһәтә. 29 йәшлек “Приора” хужаһы үҫмергә автомобиль менән идара итергә рөхсәт иткән, ул үҙе лә авария ваҡытында иҫерек көйөнсә пассажир ултырғысында ултырған. – Уны тикшереү һөҙөмтәһе 0,988 мг/л алкоголь барлығын күрһәтте. Вводитель әйтеүенсә, ул ошо ваҡиғанан һуң спиртлы эсемлек эскән, – тип һөйләне Владимир Севастьянов. Әлеге осраҡ буйынса тәртип һаҡлау органдары тикшереү үткәрә. “Водителдәрҙең йәки иҫерек йәйәүлеләрҙең юл хәрәкәте ҡағиҙәләрен тупаҫ боҙоуы тураһында Башҡортостан буйынса Эске эштәр министрлығына 8(347) 279-32-92 телефоны аша хәбәр итә алаһығыҙ. Шулай уҡ телеграм мессенджерҙа - @GIBDDRB_02bot. Юлдағы фажиғәләрҙе бергәләп кенә бөтөрә аласаҡбыҙ”, – тип яҙа Владимир Севастьянов. Видеояҙма: @V_Sevastyanov