Радий Хәбиров - Ҡыйғы районында

14 июлдә Үрге Ҡыйғы ауылында Башҡортостан Башлығы Радий Хәбиров Балаҡатай, Дыуан, Ҡариҙел, Ҡыйғы, Мәсетле, Нуриман һәм Салауат райондарының ауыл биләмәләре башлыҡтары менән зона кәңәшмәһе үткәрҙе. Көн үҙәгендә биләмәнең социаль-иҡтисади үҫешенең төп мәсьәләләре ҡаралды. Фекер алышыуҙа төрлө ведомство вәкилдәре, ҡала һәм район хакимиәттәре башлыҡтары ҡатнашты. Сара алдынан төбәк Башлығы район эшҡыуарҙарының һәм предприятиелары етештергән аҙыҡ-түлек продукцияһы күргәҙмәһе менән танышты, йәмәғәт ойошмаларының экспозицияларын ҡараны. Радий Хәбиров “Ышаныслы тыл” республика ирекмәндәр штабының вәкилдәре менән аралашты. Улар пилотһыҙ осоу аппараттары менән нисек эш итергә өйрәтә. Күптән түгел әүҙемселәр махсус хәрби операция биләмәһенән ялға ҡайтҡан яугирҙәргә лә шундай курс үткәргән. Республика Башлығы Өфөлә пилотһыҙ осоу аппараттары менән идара итеүгә операторҙар әҙерләү буйынса Үҙәктең асылыуы хаҡында белдерҙе. Унда махсус хәрби операцияға барырға теләүселәргә яраланып яуҙан ҡайтҡан яугир-инструкторҙар осоу аппараттары менән нисек эш итергә өйрәтәсәк. Улар әле үк Самара ҡалаһында хәрби әҙерлек үткән “Башҡортостан” ирекмәндәр полкы хәрбиҙәре менән шөғөлләнә. Күргәҙмәлә Радий Хәбиров урындағы халыҡ менән яҡындан аралашты, улар төбәк Башлығына Ҡыйғы районына ҡарата иғтибары һәм ярҙамы өсөн рәхмәт белдерҙе. Улар әйтеүенсә, һуңғы йылдарҙа муниципалитет күҙгә күренеп яҡшыра, яңы эш урындары барлыҡҡа килә, һаулыҡ һаҡлау өлкәһе, социаль инфраструктура үҫешә. Артабан Радий Хәбиров күндән һәм талдан эшләнгән әйберҙәрҙе ҡараны, урындағы умартасыларҙың һәм ҡымыҙ етештереүселәрҙең продукцияларын ауыҙ итте. “Версаль” баҡса үҙәге вәкилдәре Ҡыйғы районында бер нисә гектар ер бүлеме алыуҙары, төбәктә үҫемлектәр үҫтереү буйынса питомник асасаҡтары хаҡында таныштырҙы. Күргәҙмәлә шулай уҡ 2020 йылда Үрге Ҡыйғы ауылында үҙ эшен башлаған “Һөт кухняһы” төбәк филиалы вәкилдәре лә үҙ продукцияһын тәҡдим итте. Улар Ҡыйғы, Балаҡатай, Дыуан, Салауат һәм Мәсетле райондарында 1,5 меңдән ашыу баланы (өс йәшкә тиклем) бушлай һөт ризыҡтары менән тәьмин итә. “Һөт кухняһы” продукцияһы урындағы магазиндарҙа ла һатыла һәм халыҡ араһында ҙур һорау менән файҙаланыла. – “Һөт кухняһы” продукцияһы- был сифат гарантияһы. Шуныһы ҡыуаныслы, ул Башҡортостандың бөтә райондарында ла һатыла, -ти Радий Хәбиров. – Әйткәндәй, беҙ бар республиканы һөт кухнялары менән тәьмин иттек. Төбәк кәңәшмәһендә Радий Хәбиров үҙенең сығышында урындағы үҙидараның төп бурыстарын билдәләп үтте һәм киләсәктәге переспективаларын асыҡланы. – Һеҙ - республиканың идара итеү командаһының ҙур өлөшө. Һеҙҙең сифатлы эшмәкәрлегегеҙ туранан–тура беҙҙең халҡыбыҙҙың яҡшы йәшәйешенә бәйләнгән. Беҙ һәр саҡ ауыл биләмәләре башлыҡтары менән осрашыуҙар үткәрәбе, уларҙы борсоған проблемаларҙы ишетәбеҙ, хәл итеү һәм ярҙам итеү юлдарын барлайбыҙ. Сара аҙағында республика Башлығы ауыл хакимиәте башлыҡтарына уңыштар теләне һәм уларҙың башҡарған эштәре өсөн рәхмәт һүҙҙәрен еткерҙе. Фото: glavarb.ru