Кеше үлтерҙе тип 13 йылға төрмәгә ултыртҡайнылар уны...

Төрмәлә 13 йыл нахаҡҡа ултырған Фәтхулла Исхаҡовтың яҙмышы тураһында күптәр беләлер, моғайын. Ул 22 йәшлек сағында күрше ҡыҙҙарға балта менән һөжүм итеүҙә ғәйепләнә. Дүрт ауылдашы уға ялған шаһитлыҡ ҡыла. Һөҙөмтәлә Фәтхулла Исхаҡов 15 йылға хөкөм ителә һәм 13 йыл кеше енәйәте өсөн нахаҡҡа төрмәлә ултыра. Ул иреккә сыҡҡас, был хөкөм ҡарарын юҡҡа сығарыу өсөн ғәҙеллек юллай башлай. Бары 50 йыл, ярты быуат, үткәс кенә 86 йәшендә Фәтхулла ағай маҡсатына ирешә: әллә күпме ғүмер кисергәс, шаһиттар ҙа уның ғәйепле түгел икәнлеген раҫлай, ысын енәйәтсе лә үҙ ғәйебен таный. Тик енәйәт эшен ҡайтанан ҡарау өсөн тағы 10 йыл тирәһе ваҡыт үтә, сөнки хөкөм ҡарарының хаталы икәнлеген таныһалар ҙа, ғәмәлдән сығармайҙар. Һөҙөмтәлә быйыл Фәтхулла Исхаҡов үҙенең бар ғүмеренең маҡсатына – намыҫлы исемен ҡайтарыуға өлгәште. Рәсәй Юғары суды Фәтхулла Исхаҡовты тулыһынса аҡланы: 1959 йылдың 25 майында ҡабул ителгән хөкөм ҡарары ғәмәлдән сыҡҡан тип иҫәпләнә. Хәҙер оло йәштәге Фәтхулла Исхаҡов Өфө районының Ленин районы судына Башҡортостандың Финанс министрлығына ҡарата әхлаҡи зыян өсөн 450 миллион һумлыҡ компенсацияға дәғүә белдереп яҙған. Быйыл августа был эш ҡаралыр, тип көтөлә. Фото: Ксения Калинина (“Башинформ”).