Бәләкәй Айсарҙың аҫҡы урамға ниңә төшкәнен бер кем дә белмәй

Был хәлде һөйләгәндә, Хәйбулла районының Оло Әбеш ауылында йәшәгән Нурсилә Хәмитйән ҡыҙы күҙ йәштәрен тыя алманы. Был хәл бынан ете йылдар элек була. Ауыл араһынан яҙғы ҡар һыуҙары менән ағып төшкән Арба йылғаһы, аҫҡы яҡта, ярҙарына һыймай ташып аҡҡан Һаҡмар йылғаһына ҡойған ер була. Дүртенсе балаға йөклө булып йөрөгән әсә үҙенең ете йәшлек улының ҡул араһынан сығып ысҡынғанын күрмәй ҡала. Уны эҙләгәндәренсә, бер кемдең дә башына һыймаҫлыҡ хәлдәр булып өлгөрә. Бер төркөм балалар ошо йылғаларҙың ҡушылдығында уйнап йөрөгән. Шул саҡ ете йәшлек был малай һыуға ҡолап төшөп китә, өлкәнерәктәре албырғап, ололарға ярҙамға йүгерә алмай ҡатып торған саҡта, артынан һигеҙ йәшлек кенә икенсе малай һикерә. Арба йылғаһы ҙур йылғаға барып ҡушылыуға бер-нисә метр ғына ҡалғанда батып барыусыны барып тотоп, бата-сума һалҡын һыуҙы йырып кире ярға сыға ике малай. Бер-ике метрға ғына өлгөрмәһәләр, ҙур Һаҡмарҙа уларҙы хатта ололар ҙа ҡотҡарып ҡалмаҫ ине тип фаразлай ауыл халҡы. Ә инде үҙенән бер йәшкә генә кесе тиңдәшен ҡотҡарырға һикергән Айсарҙың бер ҡасан да был ярҙа, был урамда уйнағаны булмай, өҫкө урамдан алып был яҡҡа ниңә килгәнен үҙе лә белмәй, ул көндө байрамға әҙерләнеп йөрөгән ата-әсәһе лә аңлата алмай. Ә инде был хәлде ҡотҡарылған малайҙың әсәһе, Аллаһы Тәғәләнең ярҙамы төшкәндер, тип ышана. Ваҡытында, бөтә мәктәп линейкаһында батыр малайға рәхмәт әйтһәләр, быйыл иһә, “Һуңғы ҡыңғырау” көндө, ғәзиз балаһының ғүмерен ҡотҡарып алып ҡалыуға ете йыл ваҡыт үтһә лә, мәктәпте тамамлаған ҡотҡарыусы егеткә тағы ла бер тапҡыр рәхмәттәрен әйтеп, үҙенең бәләкәй генә бүләктәрен тапшырҙы әсәй кеше. – Тәрбиәле, ярҙамсыл, ихлас, егәрле булыуына һоҡланып һәр ваҡыт сәләмәтлек һәм бәхеттәр генә теләп торам Айсарға – тип уртаҡлашты ул. Иң ғәжәбе, ул ваҡытта ташҡын һыу эсендә әжәл менән көрәшкән ике малай ҙа йөҙә белмәгән булалар. Шулай булыуға ҡарамаҫтан иптәшен ҡотҡарырға һикергән баланың был эше ысын батырлыҡ түгелме ни?