Бөгөн, йәйге Сурдлимпия уйындарының беренсе көнөндә, Өфөгә Ира3тан килгән спортсы Хәсән Башҡортостандың баш ҡалаһы Өфө тураһындағы тәьҫораттарын һөйләне. - Командабыҙ Өфөгә кисә килде. Беҙ “Президент-отель”гә урынлаштыҡ. Йылы ҡабул итеүҙәренә шатбыҙ, туғандары кеүек ҡаршыланылар, - тип белдерҙе спортсы. – Беҙ, Ираҡта йәшәүселәр, Рәсәйҙе ныҡ яратабыҙ һәм бында ла һеҙҙең һөйөүҙе тойҙоҡ. Бөгөн ярыштарҙа ваҡиғалар солғанышына сумдыҡ, бында – дуҫлыҡ һәм көнәркәшлек рухы. Барлыҡ ҡатнашыусыларға ла уңыштар, көслөләргә еңеү теләйбеҙ. Хәсәндең һүҙҙәренә ҡарағанда, ул урындағы аш-һыуҙы тәмләп ҡарамаған әле, әммә быны мотлаҡ эшләйәсәк. Уға һәм йәйге Сурдлимпия уйындарында ҡатнашыусыларҙың барыһына ла уңыштар теләйек. Йәйге Сурдлимпия уйындары 23 июлдән 2 авгусҡа тиклем үткәрелә. Һаңғырауҙар араһында спорттың 21 төрө - бадминтон, гандбол, баскетбол, еңел атлетика, өҫтәл теннисы, йөҙөү, маунтинбайк велосипед спорты, шоссе велосипеды спорты, атыу, спорт ориентирлауы, волейбол, каратэ, тхэквондо, футбол, ирекле көрәш, грек-рим көрәше, дзюдо, самбо, теннис, пляжлы волейбол, боулинг - буйынса үткәрелә. Ярыштар 18 спорт ҡоролмаһында һәм объектында үткәрелә. Уйындарҙа 30 илдән, шул иҫәптән АҠШ-тан, Бразилиянан, Франциянан, Төркиәнән, Испаниянан, Израилдән, Кениянан, Филлиппиндан, Бахрейндан, Ирандан, Ираҡтан, Вьетнамдан һәм башҡаларҙан спортсылар ҡатнаша. Фото: vk.com/myvmestesport_ufa
