Хөкүмәттең бөгөнгө аҙналыҡ кәңәшмәһе башлыса махсус хәрби операцияла ҡатнашҡан яугирҙәргә һәм уларҙың ғаилә ағзаларына ярҙам итеү темаһына арналды. Был туралағы докладтар менән Башҡортостан Хөкүмәте Премьер-министры урынбаҫары – финанс министры Лира Иғтисамова, “Ватанды һаҡлаусылар” дәүләт фонды филиалы етәксеһе Гөлнур Ҡолһарина, “Ватан яугирҙәре ғаиләләре комитеты” коммерцияға ҡарамаған төбәк штабы етәксеһе Эльвира Мацкевич һәм спорт министры Руслан Хәбибов сығыш яһаны. Кәңәшмә башында яҡшы яңылыҡ билдәле булды. Башҡортостан Башлығы Радий Хәбиров хәбәр итеүенсә, Өфөләге донъя кимәлендәге Евразия ғилми-белем биреү үҙәге Рәсәйҙә иң яҡшыһы тип танылған. Был рейтингтағы еңеү республикаға үҙәкте үҫтереү өсөн өҫтәмә 158 миллион һум аҡса килтерә. – 21 июлдә Рәсәй Хөкүмәте Рәйесе урынбаҫары Дмитрий Чернышенко рәйеслегендә донъя кимәлендәге Ғилми белем биреү үҙәктәре советы ултырышы үтте. Совет 2022 йылда Рәсәйҙә бөтә ғилми-белем биреү үҙәктәре эшенә йомғаҡ яһаны һәм өс төркөмдәге рейтинг йомғаҡтарын иғлан итте. Беренсе, иң көслө төркөмдә, беҙ юғары урынды алдыҡ. Һәм хәҙер, Евразия ғилми-белем биреү үҙәге – донъяла иң яҡшыһы, тип ҡыйыу рәүештә әйтә алабыҙ, – тине республика етәксеһе. Вице-премьер – финанс министры Лира Иғтисамова белдереүенсә, Рәсәйҙә төбәктәрҙә махсус хәрби операцияла ҡатнашыусы яугирҙәр һәм уларҙың ғаилә ағзаларына ярҙам итеү буйынса берҙәм төбәк стандарты булдырыу эше башланған. Унда 20 ярҙам сараһы инәсәк, уларҙың күбеһе Башҡортостанда тормошҡа ашырыла ла инде. “Республикала берҙәм стандартҡа ярашлы өҫтәмә ярҙам сараларын индереү тураһында мәсьәлә әлеге ваҡытта профилле министрлыҡтар тарафынан өйрәнелә, яҡын арала тейешле тәҡдимдәр Башҡортостан Хөкүмәтенә индереләсәк”, – тине Лира Иғтисамова. Вице-премьер әйтеүенсә, махсус хәрби операцияла ҡатнашыусыларҙы дауалау һәм реабилитациялау иң мөһим бурыстарҙың береһе булып тора. Бер шифахана ла уларҙы ҡабул итеүҙән баш тартырға тейеш түгел, номер фондының 10 проценты яугирҙәрҙе һауыҡтырыу өсөн бүлеп ҡуйылған. Тағы бер яңылыҡ – хәрбиҙәр һорауы буйынса, бынан ары улар шифаханала йә үҙҙәре дауалана, йә был хоҡуҡты туғандарына бирә аласаҡ. Шулай уҡ бер юлламаны икегә бүлергә һәм яҡындарының береһе менән шифаханала дауаланырға мөмкин буласаҡ. Шулай уҡ пландарҙа – был хеҙмәтте МХО-ла һәләк булған яугирҙең туғандарына ла биреү. Махсус хәрби операцияла ҡатнашыусылар һәм уларҙың ғаилә ағзалары араһында килеп тыуған бөтә тормош мәсьәләләрен хәл итеү өсөн “Ватанды һаҡлаусылар” дәүләт фондының асылған филиалы берҙәм үҙәккә әйләнде. Республика Башлығы Радий Хәбиров билдәләүенсә, был осраҡта хәрби комиссариат менән әүҙем эшләргә кәрәк, сөнки тап унда теге йәки был мәсьәләләр буйынса, мәҫәлән, МХО-ла ҡатнашыусы танытмаһы алыр өсөн киләләр. – Төп урын – хәрби комиссариат. Хәрби комиссариатҡа хәрби хеҙмәткәрҙәр МХО-ла ҡатнашыусы танытмаһын алырға килә. Регламент яйға һалынырға тейеш. Улар бөтәһе лә төрлө һәм, ҡағиҙә булараҡ, тыйнаҡ кешеләр, танытма ғына аласаҡ, ә республикала булған ярҙам саралары менән ҡыҙыҡһынмаясаҡ. Бәлки, улар, яраланған булһа, адаптив спорт төрҙәре менән шөғөлләнергә теләмәҫ. Ләкин яугирҙәрҙе, улар социалләшһен өсөн, быларҙың барыһына ла йәлеп итергә кәрәк. Беҙгә уларҙы эшкә урынлаштырырға кәрәк әле, – тине Радий Хәбиров. Башҡа докладсылар ҙа республикала хәрбиҙәргә һәм уларҙың ғаилә ағзаларына нисек ярҙам ителеү тураһында ентекле мәғлүмәттәр бирҙе. Бында эш бөтә йүнәлештәр буйынса ла бара – финанс, социаль, медицина, көнкүреш ярҙам, адаптив спортҡа йәлеп итеү һәм башҡалар. Фото: bash.news