Рәсәй спорт өлкәһендә иң социаль йүнәлешле илдәрҙең береһе булып ҡала. Быны иртәгә Өфөлә башланасаҡ “Беҙ бергә. Спорт” йәйге Сурдлимпия уйындары раҫлай. Рәсәй - бөйөк спорт дәүләте. Беҙ - тотош донъя өсөн асыҡ спорт иле. Рәсәй Хөкүмәтенең матбуғат хеҙмәте хәбәр итеүенсә, вице-премьер Дмитрий Чернышенко һәм Рәсәйҙең спорт министры Олег Матыцин I “Беҙ бергә. Спорт” йәйге Сурдлимпия уйындарында ҡатнашыусыларға мөрәжәғәт иткән. “Беҙ бергә. Спорт” ярыштары масштаблы спорт хәрәкәтенә әйләнде, уға Рәсәйҙең һәм сит илдәрҙең меңләгән спортсыһы ҡушыла. Йәйге Сурдлимпия уйындары Өфөлә был сағыу хәрәкәт өлөшө булып тора. Беҙҙе ҙур саралар көтә. Башҡортостан Хөкүмәтенә һәм шәхсән Радий Хәбировҡа спорт үҫешенә иғтибар өсөн рәхмәт. Төбәк мәҙәни һәм спорт йолаларына бай, иң юғары кимәлдәге турнирҙарҙы ҡабул итерлек заманса инфраструктураға эйә. Спортсыларға уңыштар, сағыу сығыштар теләйем. Ярыштар изгелек һәм ғәҙеллек рухында үтһен!” – тип белдергән Дмитрий Чернышенко. “Спортсылар-сурдлимпиясылар спорт һөҙөмтәләрен генә күһәтеп ҡалмай, рекордтар ҡуя, тағы миллионлаған кеше араһында әүҙем тормош филосоофияһын тарата. Үҙ миҫалдары менән бер ниндәй сикләүҙәрҙең дә маҡсатҡа юлда сик түгеллеген раҫлай. Беҙ спортсыларға ниәттәрендә булышлыҡ итәбеҙ һәм уларҙың ҡаҙаныштары менән ғорурланабыҙ. Уйындарҙың халыҡ-ара Сурдлимпия хәрәкәтендә сағыу тарихи ваҡиғаға әйләнәсәгенә һәм спорт миҫалында кешеләрҙең берҙәмлегенә булышлыҡ итәсәгенә ышанабыҙ”, - тип һыҙыҡ өҫтөнә алған Олег Матыцин. Йәйге Сурдлимпия уйындары 23 июлдән 2 авгусҡа тиклем үткәрелә. Һаңғырауҙар араһында спорттың 21 төрө - бадминтон, гандбол, баскетбол, еңел атлетика, өҫтәл теннисы, йөҙөү, маунтинбайк велосипед спорты, шоссе велосипеды спорты, атыу, спорт ориентирлауы, волейбол, каратэ, тхэквондо, футбол, ирекле көрәш, грек-рим көрәше, дзюдо, самбо, теннис, пляжлы волейбол, боулинг - буйынса үткәрелә. Ярыштар 18 спорт ҡоролмаһында һәм объектында үткәрелә. Уйындарҙа 30 илдән, шул иҫәптән АҠШ-тан, Бразилиянан, Франциянан, Төркиәнән, Испаниянан, Израилдән, Кениянан, Филлиппиндан, Бахрейндан, Ирандан, Ираҡтан, Вьетнамдан һәм башҡаларҙан спортсылар ҡатнаша. Иртәгә I “Беҙ бергә. Спорт” йәйге Сурдлимпия уйындарын тантаналы асыу сараһы була. Спортсыларҙың барыһына ла уңыштар теләйбеҙ! Фотолар: vk.com/myvmestesport_ufa