Башҡортостанда "Башҡорт аты" халыҡ-ара башҡорт тоҡомло аттар фестивале уҙа. Байрам ҡунаҡтарын төрлө тоҡомло аттарҙың бер нисә дистанцияға ат сабышы, Рәсәйҙең иң ҙур ат парадтарының береһе, ат спорты ярыштары (Ауҙарыш, Тай-тулак, Ылаҡ, һыбай килеш уҡ атыу һәм башҡалар), Башҡортостан Республикаһы Башлығы Радий Хәбиров, донъяның башҡа төбәктәре башлыҡтары һәм ҡунаҡтары ҡатнашлығында ҙур эшлекле программа көтә. «Башҡорт аты-2023» халыҡ-ара башҡорт тоҡомло аттар фестиваленә илдең төрлө төбәктәренән һәм күрше илдәрҙән ат спорты ярыштарында ҡатнашыусылар һәм ҡунаҡтар килергә ниәтләй. Башҡорт аты донъяла иң боронғоларҙың береһе һанала, әммә һуңғы тиҫтә йылдар эсендә ул юғалыу ҡурҡынысы аҫтында булған. Тап шуға күрә лә башҡорт тоҡомло аттарҙы һаҡлап ҡалыу буйынса төбәк, федераль һәм халыҡ-ара кимәлдәге саралар кәрәк ине. 1991 йылда уҡ башҡорт тоҡомло атҡа авторлыҡ танытмаһы алына. Был тарихи ваҡиғаның үҙенсәлеге шунда: республика ғалимдары 1990 йылда тейешле документтар алып, күп быуатлыҡ селекцияны, йәғни тәбиғәттә булған тәбиғи һайлап алыуҙы дөйөмләштерҙе. Ул ваҡытта башҡорт тоҡомло аттарҙың һирәк осраған сифаттарын раҫлау өсөн республикаға Советтар Союзының иң яҡшы белгестәре килде. Башҡортостан Республикаһы Башлығы Радий Хәбиров тәҡдиме менән һәм республика Хөкүмәте премьер-министрының беренсе урынбаҫары Азат Бадрановтың кураторлығы аҫтында үткән тәүге "Башҡорт аты" фестивале башҡорт тоҡомло аттарҙы һаҡлап ҡалыуға һәм үҫтереүгә этәргес бирҙе. Баймаҡ районында ул саҡта биш меңдән ашыу кеше беренсе фестиваль ҡунаҡтары булды. Улар иҫәбендә Ҡалмыҡ Республикаһы башлығы Бату Хасиков етәкселегендәге, шулай уҡ Ҡаҙағстан, Ҡырғыҙстан, Тажикстан, Үзбәкстан делегациялары һәм илдең 20-нән ашыу төбәге вәкилдәре булды. Республика етәкселеге иғтибары арҡаһында юғалыу сигенә еткән башҡорт аты тоҡомо һаҡланып ҡалынды. Был процесты артабан да нығытыу өсөн тиҫтәләрсә төрлө ғилми саралар һәм ат спорты ярыштары уҙғарыла: «Бөтә Рәсәй йылҡысылыҡ ғими-тикшеренеү институты» федераль дәүләт бюджет учреждениеһы һәм Дағстандың "Кун-батар" ат-спорт клубы менән үҙ-ара мөнәсәбәттәр көйләнгән, башҡорт тоҡомло аттарҙың үҙенсәлекле һыҙаттарын һәм тоҡомдо дөрөҫ асыҡлау буйынса иммун-генетик анализдар үткәрелгән. "Ирәндек" хәйриә фонды Башҡортостан Республикаһында башҡорт тоҡомло аттарҙы һаҡлау һәм үҫтереү буйынса йылҡысылыҡты үҫтереү процесына әүҙем ҡушылды. Айтуған Фәттәхов фотоһы. Сығанаҡ: https://mgazeta.com/news/novosti/2023-07-21/v-bashkirii-proydet-mezhdunarodnyy-festival-loshadey-bashkirskoy-porody-bashkort-aty-3350718