Башҡортостан Хөкүмәте Премьер-министры Андрей Назаров социаль селтәрҙәге сәхифәһендә түбәндәгеләр тураһында яҙҙы. “Екатеринбургта барған халыҡ-ара “Иннопром-2023” сәнәғәт күргәҙмәһендә Рәсәй Хөкүмәте Премьер-министры Михаил Мишустин Көнбайыштың илебеҙҙе ҡалған донъянан айырырға маташыуының Рәсәй иҡтисадына ҡыҙыҡһыныуҙың артыуына ҡамасаулай алманы, тип белдерҙе. “Иннопром”да ғына донъяның 35 иленән компаниялар үҙ продукцияһын ҡуйҙы. Быны республикабыҙҙа “Урал аръяғы” кеүек инвестһабантуйҙы, Халыҡ-ара эшҡыуарлыҡ аҙнаһын һәм башҡаларҙы үткәреү тәжрибәһе лә раҫлай. Премьер-министр дүрт йылда илдә сәнәғәт етештереүенең 7 процентҡа артыуы тураһында белдерҙе. Бында ул машиналар төҙөү комплексын драйвер, тип атаны. Республикабыҙ сәнәғәте, былтырғы майға ҡарата, 117,3, былтырғы осорға ҡарата, ғинуар – майҙа 104,8 процентҡа үҫеш күрһәтте. Премьер-министр шулай уҡ элекке кеүек импорт технологияларға таяныу кеүек эш моделенә кире ҡайтмаясаҡтары хаҡында әйтте. Барлыҡ киҫкен тармаҡтарҙа ла тулыһынса технологик суверенитет кәрәк. Киләсәк – үҙ юғары технологиялы, ситтә көнәркәшлеккә һәләтле продукцияның барлыҡ спектрын сығарыуҙа. Бының өсөн принципиаль яңы алымдар һәм фән, етештереү һәм дәүләт менән эш итеүҙең бөтөнләй яңы кимәле кәрәк. Үҙебеҙҙә донъя кимәлендәге Евразия ғилми-белем үҙәгенә һәм Вуз-ара студенттар кампусына баҫым яһайбыҙ. Күптән түгел илдең технологик үҫеше концепцияһы, Премьер һүҙҙәренә ҡарағанда, төп йүнәлештәрҙең – станоктар төҙөүҙең, радиоэлектрониканың, химияның, авиатөҙөлөштөң, медицина изделиеларының, дарыуҙарҙың һәм башҡаларҙың үҫешенә ныҡлы импульс буласаҡ. Маҡсатыбыҙ – төрлө яҡлап һәм системалы рәүештә бизнесҡа сит ил конкуренттары биләгән йүнәлештәрҙе ябырға булышлыҡ итеү. Был, тәү сиратта, яңы эш урындарын һәм бюджетҡа һалым иҫәпләмәләрен аңлата”. Фото, сығанаҡ: Башҡортостан Хөкүмәте Премьер-министры Андрей Назаровтың социаль селтәрҙәге сәхифәһенән.