Әбйәлил районының Йәнекәй ауылында йәшәгән бер туған Рәфис, Рафиҡ, Фәйез Ҡунаҡҡоловтарҙың хәл-әхүәле тураһында йыш таныштырып торабыҙ. Белеүебеҙсә, нәҫел сире сәбәпле инвалид булып, ауыр ғына шарттарҙа йәшәгән замандаштарыбыҙҙың көнитмешенә, проблемаларына тәүгеләрҙән булып Рәхмәт ауылында йәшәгән Идиә Ғәлимова иғтибар итә, журналистар Рәхимә Мусина, Рәмзиә Кәримова һәм башҡалар киң йәмәғәтселеккә еткерә. Ҡунаҡҡоловтар хаҡында йәнә шатлыҡлы хәбәр бар. Был турала тележурналист Рәмзиә Кәримова "Бәйләнештә"ге сәхифәһенә яҙған. "Ҡунаҡҡоловтарҙы юғалтманығыҙмы, дуҫтарым? Юғалтмағыҙ! Егеттәр гөрләтеп донъя көтөп ята. Өйгә аш-һыу бүлмәһе төкөтөп, залдарын эстән евровагонка менән көпләп, яңы линолеум йәйеп, обойҙар йәбештереп мәж килгәндәр, картуф сәстергәндәр, ҡош-ҡорт алғандар. Ә бөгөн беҙ Йәнекәйҙә Ҡунаҡҡоловтарҙа ярҙам итешкән кешеләрҙе саҡырып ҡорбан ашы үткәрҙек, ике йыл дауамындағы эшебеҙҙе йомғаҡлап ҡуйҙыҡ. Шулай итеп, 2021 йылда Башҡортостан юлдаш телевидениеһында эфирға сыҡҡан репортажымдың һөҙөмтәһе: 1. Физик мөмкинлектәре сикләнгән ағалы-ҡустылы Ҡунаҡҡоловтарҙың йортона һыу, канализация үткәрҙек.2. Йыуыныу бүлмәһе эшләнек.3. Кер йыуыу машинаһы бүләк иттек.4. Өйҙәренә газ индерҙек.5. Рәфискә 1-се төркөм инвалидлығы юлланыҡ.6. Бушлай инвалид коляскаларына сиратҡа ҡуйҙыҡ.7. Төҙөлөш материалдары, 10 кубометрҙан ашыу ағас-таҡта алып барҙыҡ.8. Сенсор телефондар, гармун бүләк иттек.9. Документтарын тәртипкә килтерҙек.10. Аҡсалата ярҙам йыйҙыҡ.11. Өфөнөң тарихи урындарына, Милли музейға экскурсия ойошторҙоҡ, "Бәхет хаҡы" спектаклен ҡараныҡ. Быларҙы нимәгә теҙеп яҙа тиһегеҙме? Ошо изге эштәр өсөн һәр берегеҙгә рәхмәт әйтергә теләйем. Эйе, һүҙҙең ҡөҙрәте сикһеҙ! Әммә һүҙ көскә эйә булһын өсөн журналист артында һәр башланғысын хуплаусы, күтәреп алыусы кешеләр тороуы мөһим! Һеҙҙән башҡа ошо эштәрҙе йырып сыға алмаҫ инем, кемдер аҡса күсереп, икенселәре хуплап, өсөнсөләре комментарий яҙып, лайк ҡуйып, мәғлүмәтте таратышып ярҙам итте. Бөтәгеҙгә лә ҙур рәхмәт! Хоҙай һеҙҙе һаулыҡтан айырмаһын. PS. Маҡтанып та алайым әле! Ҡунаҡҡоловтарым "эшебеҙ тамамланыу хөрмәтенә" тип күлдәк кейҙерҙе бит әле! Күҙҙең яуын алып торған балитәкле күлдәк, костюмы, селтәре менән! Ҙур рәхмәт, егеттәр! Эшебеҙҙең, уңайлыҡтарҙың мәнфәғәтен күреп, оҙаҡ йәшәргә яҙһын!" - тип яҙған Рәмзиә Кәримова. Мәрхәмәтле замандаштарыбыҙ, күрһәткән изгелектәрегеҙ үҙегеҙгә йөҙләтә әйләнеп ҡайтһын! Фото һәм сығанаҡ: Рәмзиә Кәримова.