Бөгөн, 8 июлдә, "Өфө-Арена" спорт комплексы алдындағы майҙанда яугирҙәрҙе ике аҙналыҡ ялдан һуң махсус хәрби операция биләмәһенә оҙаттылар. Тантаналы сарала Башҡортостан Хөкүмәте Премьер-министры урынбаҫары Ирек Сәғитов сығыш яһап, яугирҙәргә хәрби бурыстарын артабан да уңышлы үтәүҙәрен теләне. "Хәрби хеҙмәттәге яҡташтарыбыҙға Башҡортостан халҡынан сәләм әйтегеҙ, батырлыҡтары, ҡаһарманлыҡтары өсөн рәхмәтебеҙҙе еткерегеҙ. Барлыҡ республика һеҙҙең менән ғорурлана. Барығыҙҙы ла еңеү менән көтәбеҙ, иҫән-һау әйләнеп ҡайтығыҙ", - тине вице-премьер. Яугирҙәр үҙҙәре һөйләүенсә, улар күберәк ваҡытын туғандары, яҡындары менән үткәргән, өй эштәре менән шөғөлләнгән. Шулай уҡ батырлыҡ дәрестәрендә лә ҡатнашҡандар, йәштәр менән осрашҡандар, уларҙың төрлө һорауҙарына яуап биргәндәр. Яугирҙәр фекеренсә, бындай аралашыу уларҙың үҙҙәре өсөн дә, үҫеп килгән быуынға бик мөһим. Ни өсөн тигәндә, яугир-геройҙар менән яҡындан һөйләшеп, дөрөҫ мәғлүмәт алып, йәштәр төрлө фейктарҙан алданмаясаҡ. Оҙатыусылар араһында яугирҙәрҙең әле алғы һыҙыҡтағы хеҙмәттәштәренең туғандары ла булды. Улар егеттәрҙән махсус хәрби биләмәгә күстәнәс, хат тапшырыуҙарын һораны. Йылы хушлашыуҙан һуң яугирҙәребеҙ "Башавтотранс" автобустарында юлға сыҡты. Маршруттар республика Башлығы Радий Хәбиров ҡушыуы буйынса махсус ойошторолдо. Сергей Словохотов фотоһы.