Краснокама районының яңы Ҡайынлыҡ ауылында йәштәр һабантуйы үтте. Байрамды асыу тантанаһында үҫеп килгән быуынды тәрбиәләүгә, райондың йәштәр хәрәкәтен үҫтереүгә ҙур өлөш индергән әүҙемселәрҙе тәбрикләнеләр. Артабан спорт, мәҙәни сараларҙан бай программа тәҡдим ителде. Волейбол, көрәш, гер спорты, армрестлинг, шахмат, шашка буйынса ярыштар ойошторолдо. Балалар, атай-әсәйҙәр өсөн халыҡ уйындары үткәрелде. Төп сәхнәлә Краснокама районы ауылдарының үҙешмәкәр ижади коллективтары сығыш яһаны. Ҡунаҡтар өсөн башҡорт, рус, татар, мари милли ихаталары булдырылғайны. Сараға сәйлән үреү, ағастан һырлау буйынса оҫталар ҙа саҡырылғайны. Республиканың Халыҡтар дуҫлығы йорто филиалы - "Никольский ҡорамы" тарихи-мәҙәни үҙәге Ғаилә, мөхәббәт һәм тоғролоҡ көнөнә ҡурсаҡтар күргәҙмәһе әҙерләгән. Был ойошманың баш белгесе Елена күп йылдар инде ошондай ҡул эштәре менән шөғөлләнә. Ҡурсаҡтар элек-электән рус мәҙәниәтенең мөһим өлөшө булған. Уларҙы тик ҡатын-ҡыҙҙар ғына эшләган, һәм айырым ҡағиҙәләр буйынса кейемдән япмалар алған, ҡайсы, энәләр ҡулланмаған, яуыз рух үтеп инмәһен өсөн ҡурсаҡҡа йөҙ төшөрмәгән. Фото: Краснокама районы хакимиәте.