Биир дойдулааҕым Инна, Соҕуруу Казахстан киинигэр, Туркестан куоракка үрдүк үөрэх кыһатыгар үөрэнэ сылдьарын истэммин олус үөрдүм. Саха кыыһа Казахстаҥҥа хайдах үөрэнэ сылдьар эбитий?
— Инна, бэйэн тускунан уонна билигин ханна туох идэтигэр үөрэнэ сылдьаргын кэпсээ.
— Үтүө күнүнэн, мин аатым Герасимова Инна. Үөһээ Бүлүү улууһун Хоро нэһилиэгиттэн сылдьабын. Билигин Соҕуруу Казахстан религиознай Туркестан куоратыгар үөрэнэбин. Үөрэнэр университетым аата Международный Казахско - Турецкий университет имени Ходжа Ахмета Ясави. Туризм диэн хайысхаҕа босхо үөрэнэр быраапка туттарсан киирбитим.
— Хаһааҥҥыттан тас дойдуга тахсан үөрэнэр туһунан толкуйдаабыккыный уонна хантан истэн туттарсарга санаммыккыный?
— Мин кыра эрдэхпиттэн атын дойдулары көрүөхпүн олус баҕарар этим. Тоҥоруллубут муора аһылыктарын игин атыылаһан, тас омук дойдутун амтанын билэ сатыырым (күлэр). Улаатан истэҕим аайы тас дойдуга туттарсыахпын баҕарар күүһүм тэңңэ улаатан испитэ. Улахан Европа куораттарын көрө да барбат этим, дьонум харчытын харыһыйарым уонна бэйэм күүспүнэн туттарсан киириэхпин баҕарарым. Ити курдук мин хараҕым, баҕа санаам Казахстаңңа иңпитэ. 9 кылаастан МКТУ-га туттарсыахпын баҕарбытым. Үөһээ Бүлүү Кэнтигин кыыһа үөрэнэ сылдьарын истэн олус үөрбүтүм, кинини кытары кэпсэтэн, кини сүбэлэрин истэн бу баҕалаах университеппар үөрэнэ-сайда сылдьабын.
— Үөрэнэр дойдуну талыы хаамыыта хайдах ааспытай уонна үөрэнэ сылдьар университеткыттан ураты өссө ханнык варианнар бааллар этэй?
— Бастатан туран Казахстан валютата тенге, ол эбэтэр мин дьоммуттан аҕыйах харчы көрдөһүөм диэн толкуйдаах этим. Казахтар саха курдук дьүһүннээхтэр онон ким дағаны туора көрүө суоҕа диэн сабаҕалаабытым. Уонна онтон биллэн турар казах омук ыалдьытымсаҕынан аан дойдуга аатырар. Мин 11 кылаас кэннэ СВФУ-га киирбитим, сыл аңаара үөрэммитим, сессиябын туйгуннук сабан баран уурайбытым. Миэнэ буотах эбит диэн өйдөөбүтүм уонна ол күһүн Казахстаңңа туттарсан киирбитим.
— Тиийэн бара туох ыарахаттары көрүстүҥ? Тылы эрдэттэн билэр этиҥ дуу эбэтэр тиийэн баран үөрэппитиҥ?
— Дьиэм аанын сабаат харах уутунан сууммуппун өйдүүбүн. Саамай ыарахан чааһа дьоңңуттан арахсыы, саңа климат, аны астара да5аны ураты, атын тыл, туспа эйгэ. Үйэбэр биирдэ да5аны самолетунан көппөтөх буолан долгуйуу этэ, хас да5аны пересадка, аны суос со5отохпун, ыал кыра атаах о5ото буолан эрэйдэммитим. Казахскай да турецкай да тылы билбэт этим. Мин нууччалыы үөрэнэбин дии санаан барбытым, онтукам сыыспыт эбиппин. Бастатан туран бу университекка грант (бюджет) миэстэтин ыларга казахскай уонна турецкай тылгын көрөллөр. Тылы ый курдугунан син мээнэ өйдөһөр буолбутум, түүр тыллаах буоламмын өйдүүр этим. Грамматикабыт игин тэң соҕус уонна тыллар эмиэ маарыннаһаллар. Билигин мин 5 тылы билэбин - сахалыы, нууччалыы, английскайдыы, турецкайдыы уонна казахскайдыы.
— Казахстаҥҥа сахалар төһө элбэхтэрий? Эн үөрэххэр хас саха баарый?
— Сахалар Туркестаңңа 8 кыыс баарбыт, олус түмсүүлээхпит. Туох кыалларынан куруук бэйэ-бэйэбитигэр көмө буолабыт. Бүтүн Казахстан үрдүнэн саха элбээтэ, быйыл ыам ыйын 20 күнүгэр улахан ыһыах буолараары турар Алматы куоракка. Бу биллэн турар, сахалар түмсүүлээхпитин көрдөрөр тыыннаах холобур дии саныыбын. Сахабыт былааҕа университеппытыгар ыйанан турар, онон хас бырааһынньык аайы былаахпытын өрө тутан сылдьабыт.
— Иллэҥ кэмҥэр үөрэхтэн ураты тугунан дьарыктанаҕын?
— Иллэң бириэмэбэр ордук кыракый айаннарга турунарбын сөбүлүүбүн. Ол курдук Узбекистаңңа, Киргизияға сылдьыбытым уонна Казахстан улахан куораттарынан сылдьарбын сөбүлүүбүн, дьону кытары билсиһэбин. Хаартыскаға түһэрэллэр, видео5а усталлар, казахскайдыы саңарарбын истэн олус үөрэллэр. Ону таһынан нумерологиянан дьарыктанабын. Ардыгар залга сылдьабын уонна онтон студент оҕо буоларым быһыытынан доҕотторбунаан бириэмэ атаарабын.
— Үөрэххин бүтэрэн баран тугунан дьарыктанар былааннааххын, Казахстаҥҥа хааларын буолуо?
— Үөрэхпин бүтэриэм билигин дағаны толору 3 сыл баар, ол кэннэ туризм өттүнэн үлэлиир - сайдар сыаллаахпын, сыалбын туруорбутум ол эрэн оңордохпуна көрдөрүөм. Ханна олохсуйарбын билбэппин, бириэмэ көрдөрөн иһиэ…
— Инна, бүгүҥҥү кэпсэтиин иһин барҕа махтал! Үөрэххэр уонна тус олоххор ситиһиилэри баҕарабын. Аартыгын суола арылла турдун, толкуйдаабытын тобуллан истин. Бу курдук Саха буолан сандаара сырыт!
Камила Михайлова