7 июлдә Пермь крайы судында Андрей Серебровҡа хөкөм ҡарары сығарғандар. Ул Башҡортостанда йәшәгән 45 йәшлек Таисия менән уның биш йәшлек ҡыҙын вәхшиҙәрсә үлтереүҙә ғәйепле тип танылған. Пермь крайын һәм Башҡортостанды тетрәткән енәйәт уҙған йылдың йәйендә булған. Таисия ҡыҙы менән бергә әхирәте Майяға Пермгә ҡнаҡҡа килгән. Ике көнгә генә барам, тип әйткән ҡатын оҙаҡламай бәйләнешкә сыҡмай башлаған. “Беҙ кис табында ултырҙыҡ, унан һүҙгә килештек, Таисия ҡыҙын алды ла сығып китте”, - тип белдергән тәүҙә уны ҡунаҡҡа саҡырған әхирәте Майа. Таисияның туғандары полицияға ғариза яҙған. Бер нисә көндән әсә һәм баланың үле кәүҙәһе Краснокамск эргәһендәге урманда табылған. Шик шунда уҡ Майаға төшкән. Асыҡланыуынса, ҡатын әхирәтен үлтереүҙе алдан планлаштырған һәм 40 йәшлек танышын яллаған. Был икәү Ласьва тигән ауылда бер йортто ҡуртымға алып, Таисияны, йәнәһе, шунда ял итергә саҡырған. Вәхши, әсә һәм баланы үлтергәс, кәүҙәләрен урманға алып барып күмгәндәр. Тәфтишселәр Майанан енәйәт сәбәбе менән ҡыҙыҡһынғас, ул: “2013 йылда Тая “ҡара магия” менән шөғөлләнә башланы, мине сихырланы һәм фатирымды тартып алырға ниәтләй ине. Шуға уны үлтереүҙән башҡа сарам юҡ ине”, - тип яуап биргән. Майаның психиарҙа иҫәптә торғаны мәғлүм. Шулай уҡ был ике ҡатын ҡасандыр бергә төрмәлә ултырған. Әлеге ваҡытта Майа һаҡ аҫтында, суд ҡарарын көтә. Уны психиатрия клиникаһына дауаланырға ебәреүҙәре лә ихтимал. Ә ҡатын менән баланың ғүмерен өҙгән вәхши ғүмерлеккә тимер рәшәткә артына юлланасаҡ. Фото: kp.ru