Был тармаҡҡа ҡыҙыҡһыныу ҙур

7 июлдә Кушнаренко районында Башҡортостан Башлығы Радий Хәбиров “Первушино” аэродром комплексында булды. Унда Рәсәйҙең дөйөм тәғәйенләнештәге III авиация конгресын һәм XVII Бөтә Рәсәй авиация һөйөүселәр слетын асыу тантанаһында ҡатнашты. Төбәк етәксеһе сарала ҡатнашыусыларҙы Рәсәй граждан авиацияһының 100 йыллығы һәм Башҡортостандың граждан авиацияһының 90 йыллығы менән ҡотланы. – Бөгөн беҙгә бик күп ҡунаҡтар - дөйөм тәғәйенләнештәге авиация ватансылары килде. Был Рәсәй төбәктәренән 25-тән ашыу команда. Һеҙҙе ысын күңелдән ҡунаҡсыл Башҡортостанда сәләмләйбеҙ, - тине Радий Хәбиров. - Беҙҙең республика һәр саҡ үҙенең авиация ҡаҙаныштары һәм күк геройҙары менән дан тота. Шуларҙың иң билдәлеһе - легендар лётчик-штурмовик, ике тапҡыр Советтар Союзы Геройы Муса Ғайса улы Гәрәев, ул Башҡортостан ДОСААФ-ы етәксеһе булды, авиацияны үҫтереү өсөн күп нәмә эшләгән. Бынан тыш, төбәктә заманса авиация двигателдәре, вертолет техникаһы, пилотһыҙ осоу аппараттары етештерелә. Һеҙгә уңыштар, һөҙөмтәле эш һәм сағыу сығыштар теләйем. Сәләмләү һүҙе менән Төбәк-ара пилоттар һәм һауа суднолары хужалары йәмәғәт ойошмаһы президенты Иван Жаднов сығыш яһаны. – Шуныһы ҡыуаныслы: Башҡортостанда еңел моторлы авиацияны үҫтереү өсөн ошондай майҙансыҡ бар. Был йәһәттән һеҙҙә яҡшы мөмкинлектәр бар, - тип билдәләне ул. - Барығыҙҙы ла авиация байрамы - Рәсәй биләмәһендә иң яҡшыларҙың береһе асылыуы менән ҡотлайым. Сараны асыу тантанаһынан һуң Башҡортостан Башлығы һәм абруйлы ҡунаҡтар фестивалдең тамаша программаһында ҡатнашыусы пилоттарҙың сығыштарын ҡараны, шулай уҡ һауа судноларын - ЯК-12, СП-30, СК-12 «Орион», «Борей» самолеттарын һәм «Танго» автожирын ҡараны. Рәсәй дөйөм тәғәйенләнештәге Авиация федерацияһы президенты, «Первушино» аэродром комплексы етәксеһе Сергей Миңлеғолов аңлатыуынса, ЯК-12 самолеты уникаль булып тора. Уны 1947 йылда илдең иҡтисади ихтыяждары өсөн, атап әйткәндә, почта аша ебәрелгән әйберҙәрҙе ташыу һәм кешеләрҙе ҡотҡарыу өсөн дөйөм тәғәйенләнештәге беренсе аҙ урынлы самолёт булараҡ әҙерләгәндәр. Ә «Борей» һәм «Душа Каспия» гидросамолеттары тулыһынса ватан эшкәртмәләре булып тора һәм донъяла аналогтары юҡ тиерлек. Сергей Миңлеғолов «Первушино» аэродромында бөтәһе 28 үтә еңел һәм еңел һауа судноһы - 26 самолёт һәм ике вертолет булыуы хаҡында һөйләне. Аэродромда дөйөм тәғәйенләнештәге авиация өсөн пилоттар әҙерләү буйынса сертификацияланған авиация уҡыу үҙәге эшләй. Рәсәй дөйөм тәғәйенләнештәге III Авиация конгресы ултырышында тармаҡты үҫтереүҙең көнүҙәк мәсьәләләре тикшерелде. Улар иҫәбендә - осоштарҙы хоҡуҡи көйләү, пилоттар әҙерләү, шәхси һәм эшлекле авиация туризмы, йәштәргә һөнәри йүнәлеш биреү, һауа судноларын төҙөү һәм әҙерләү. - Рәсәйҙә аэроклубтар, авиация уҡыу үҙәктәре һәм етештереү предприятиелары эшләй, - тип билдәләне Сергей Миңлеғолов. - Шул уҡ ваҡытта төп мәсьәләләрҙең береһе - дөйөм тәғәйенләнештәге авиацияны хоҡуҡи көйләү. Һауа суднолары хужаларының төбәк-ара йәмәғәт ойошмаһы президенты Иван Жаднов АОН үҫешенең төп йүнәлештәрен, ә «Первушино» аэродромының Өфө авиация уҡытыу үҙәге начальнигы Оксана Тимофеева тармаҡ белгестәрен әҙерләү тураһында һөйләне. «Аэроволга» ойошмаһының Директорҙар советы рәйесе, шәхси пилот Сергей Алафинов конструкторҙар бюроһының үҫеше һәм үтә еңел самолёттарҙың яңы эшләнмәләре тураһында фекер алышты. Пермь крайының үтә еңел авиация спорты федерацияһы рәйесе Юрий Гилей, авиация туризмын үҫтереүгә баҙарҙың артыҡ көйләнгән булыуы ҡамасаулай, тип иҫәпләй. Дөйөм алғанда, туристик тармаҡтыы үҫтереү өсөн инфраструктураны әүҙемерәк үҫтерергә һәм кешеләр өсөн уңайлы шарттар булдырырға кәрәк. Эш аҙағында Радий Хәбиров дөйөм тәғәйенләнештәге авиация федерацияһы вәкилдәренә тәҡдимдәр әҙерләргә һәм «Транспорт сәғәттәренең» береһендә булған проблемаларҙы тикшерергә тәҡдим итте. Башҡортостан Башлығы сайты.