7 июлдә Өфөнөң Киров районында Башҡортостан Башлығы Радий Хәбиров 21-се ҡала лицейында булды һәм унда интеллектуаль видеокүҙәтеү системаһы эше менән танышты. Уны дөйөм белем биреү мәктәптәре биләмәһендә хәүефһеҙ мөхит булдырыу өсөн төбәк етәксеһе ҡушыуы буйынса әҙерләгәндәр. Мәғариф һәм фән министры Айбулат Хажин билдәләүенсә, система уҡыу йылы дауамында һыналған. Бының өсөн мәктәп белгестәре тейешле әҙерлек үткән. – Видеокүҙәтеү комплексы тәүлек әйләнәһенә мәктәптәргә килеүселәр араһында хәүефле кешеләрҙе, шул иҫәптән уҡыусылар араһынан да таный, биометрик мәғлүмәттәр һәм физиогномиканы ҡараясаҡ, шулай уҡ автоматик рәүештә кеше ҡулында атыу ҡоралын билдәләйәсәк. Был хаҡта мәғлүмәт бер нисә секунд эсендә хоҡуҡ һаҡлау органдарына һәм мәктәп хакимиәтенә килә, - тип аңлатма бирҙе Айбулат Хажин. - Яңы уҡыу йылында республиканың бер нисә мәктәбендә ошондай ҡорамал барлыҡҡа киләсәк. Башҡортостан Башлығы интеллектуаль видеокүҙәтеү индереүҙең мөһимлеген билдәләне һәм тәү сиратта төбәктең ҙур ҡалалары мәктәптәрен йыһазландырыу кәрәклеген һыҙыҡ өҫтөнә алды. - Системаның техник режимда эшләүе мөһим. Ул мәктәп территорияһында хәүефһеҙ периметр булдырыуҙа ярҙам итәсәк. 1 сентябрҙән республикала уны этаплап индерә башлайбыҙ, - тине Радий Хәбиров. Фото: Башҡортостан Башлығы сайты.