Был ғаилә драмаһы тураһында аҙна башында билдәле булды. Өфөлә йәшәгән ҡатын элекке ире уны һәм уларҙың уртаҡ балаһын туҡмауы, аҙаҡ ирҙең был малайҙы урлауы тураһында хәбәр итте. Ир менән ҡатын православныйҙар өсөн танышыу сайтында танышҡан. Сәнғәт тармағында эшләгән ир күп тә аралашмай Мәскәүҙән Өфөгә килә һәм яҡташыбыҙға кейәүгә сығырға тәҡдим яһай. Туйҙан һуң ҡатынды Ҡырымға алып китә, унда уның торлағы бар. Тик өйләнешеү менән ир үҙгәрә һәм дини фанатикка әйләнә. Яңы тыуған малайын сыбыҡ менән туҡмай, имеш был сабыйға рухи үҫеш өсөн кәрәк. Шулай йәшәп ятҡан саҡта ҡатын тағы ауырға ҡала һәм ирен әсәһе менән күрешер өсөн Өфөгә ебәреүен үтенә. Тыуған яғына ҡайтҡас иһә, иренән йәшенә һәм уны яуаплылыҡҡа тарттырыға тырыша. Әйткәндәй, ир бындай ғәйепләүҙәр менән ризалашмай һәм ҡатынды никах аферисты тип атай. Йәнәһе, ҡатыны уның аҡсаһын урлап ҡасҡан. Тик нисек һәм ниндәй сумма урлауы тураһында бер нимә лә әйтә алмаған. Ә ошо көндәрҙә ир ғаиләһен күрәм тип Өфөгә килә һәм ике йәше лә тулмаған улын урлап ҡаса. – Беҙ ике улым менән балалар майҙансығында инек. Элекке ирем бер туған апаһы менән балаларҙы күрергә тип Өфөгә килгән. Улар ыңғайына торғаным өсөн бик үкенәм. Икәүләп яныбыҙға килделәр һәм һөйләшеп торҙолар. Шул саҡта апаһы телефонын биреп, минең иғтибарҙы икенсе нәмәгә йүнәлтте. Ирем иһә шул мәлдә өлкән улымды алып ҡасҡан. Сквер буйлап йүгерә башланым, эҙләнем. Апаһы тынысландырған булды, бер кем дә балаңды алмай тине. Һөҙөмтәлә, улым юҡ, – тигән ҡатын “Башинформ” агентлығына. Һуңғараҡ, апаһы ла ҡаса, бала менән ир ҙә юҡ була. Әсә кеше полицияға ғариза биргән, шулай уҡ Тәфтиш комитетын да эшкә ҡушҡандар. Бала айырылышҡандан һуң тыуған, тик тыуыу тураһындағы таныҡлыҡта ир атаһы булараҡ теркәлгән. Атай кешелә документтың дубликаты бар. – Улым атаһын күргәс, йомолдо, ҡысҡырҙы, уның янына бармаҫҡа тырышты, минең артымда йәшенде. Сөнки малай атаһының нисек мыҫҡыл иткәнен, приказлы тонда һөйләшкәнен иҫләй, – тигән әсә. Ҡатындың адвокаты әйтеүенсә, улар бер ай элек ирҙең баланы урларға теләүе тураһында ғариза биргән. Малайға әле ике йәш, ул һөйләшмәй, атаһынан ҡурҡа. – Бала өсөн был ҙур стресс. Хатта ул уны туҡмамаған хәлдә лә (элек туҡмағас, әле үҙгәргәндер тип уйламайым), барыбер баланы ҡурҡытасаҡ. Был кеше элек хөкөмгә тарттырылған булған, төрмәлә ултырған. Тәфтиш комитеты быларҙың барыһын да күҙ уңында тотор һәм баланы эҙләү саралары күрер тип ышанабыҙ, – тигән адвокат. Кисә иһә ҡатын иренә шылтырата алған. Һөйләшеү бик эмоциональ килеп сыҡҡан, тик улар уртаҡ фекергә килә алмағандар. Ҡатын улын ҡайтарыуҙы талап иткән, ир иһә: “Әйҙә әрләшмәйек. Һинең балаң бар бит (яңыраҡ тыуған бәләкәй улы), уның менән шөғөллән, ә мин ҙуры менән булам”, – тигән. Был баланың да бәләкәй булыуы һәм әсәһе кәрәклеге тураһындағы һүҙҙәргә ир иғтибар итмәгән. Әйткәндәй, Өфөлә ирекмәндәр атаһы менән бергә юғалған малайҙы эҙләй башлаған. “Лиза Алерт” ирекмәндәре хәбәр итеүенсә, баланың ҡайҙалағы тураһында 4 июлдән билдәле түгел. Тихондың буйы 85 см, сәстәре һары, күҙе күк төҫтә. Аҡ футболка, йәшел шорты, зәңгәр сандали кейгән булған. Баланың ҡайҙа икәнлеге тураһында мәғлүмәт билдәле булһа, уны тиҙ арала “ЛизаАлерт” эҙләү отрядының ҡыҙыу линияһына 8(800)700-54-52 һандарына шылтыратып хәбәр итеүегеҙҙе йәки 112 һандары буйынса шылтыратыуҙы һорайҙар. Фото: ӨЧестно говоря".