Әле тышҡа сығырлыҡ түгел, эҫе ҡурып бара. Был кешеләр өсөн ҙур хәүеф тыуҙырыуы ихтимал. Республиканың Ғәҙәттән тыш хәлдәр буйынса дәүләт комитеты эҫе көндәрҙә үҙеңде нисек тоторға кәңәш бирә. Эҫе көндәрҙе һаулыҡҡа зыянһыҙ үткәрер өсөн ябай ҡағиҙәләрҙе иҫәптә тоторға кәрәк. Мөмкинлек булғанда эҫе һауа торошонда ҙур физик эш менән шөғөлләнмәгеҙ, магазиндар буйлап оҙаҡ йөрөмәгеҙ. Юлға күберәк ваҡыт бүлеп ҡуйығыҙ, эҫелә йөрөү тиҙлеге әкренәйә. Ҡояшҡа сығыуығыҙҙы иртәнге һәм киске сәғәттәр менән сикләргә тырышығыҙ. Сәғәт 10-ға тиклем һәм 16 сәғәттән һуң тышта йөрөгөҙ. Өлкән йәштәгеләргә һәм бәләкәй балаларға, шулай уҡ гипертония сирҙәренән яфаланғандарға табиптар урамға эҫелә сыҡмаҫҡа кәңәш итә. Кәңәш үтәлмәҫтәй булһа, күләгәлә булырға тырышығыҙ, мотлаҡ башығыҙҙы ҡаплап йөрөгөҙ. Балаларҙы урамға, шәхси автомобилдә һ.б. ҡарауһыҙ ҡалдырмағыҙ. Автомобилселәргә нимәгә иғтибар итергә? Руль артында һаҡ булығыҙ. Ҡыҙған салонда водителдәр тиҙ арый, уларҙың иғтибары кәмей, юл-транспорт ваҡиғаларының барлыҡҡа килеү ҡурҡынысы арта. Эҫелек арҡаһында ҡыйын була башлаһа, шунда уҡ тиҙлекте кәметегеҙ һәм автомобилде туҡтатығыҙ. Бер ҡасан да тәҙрәнән һүндерелмәгән шырпы һәм тәмәкене ташларға ярамай, сөнки улар етди янғын сәбәбе булыуы ихтимал. Эҫелә нимә эсергә? Эҫе көндәрҙә организмдың күп шыйыҡлыҡты юғалтыуын иҫәпкә алып, боҙолған һыу балансын компенсацияларға кәрәк. Ошо маҡсатта көнөнә кәмендә ике литр шыйыҡса эсегеҙ. Ашыҡмай, бәләкәй йотомдар эшләгеҙ. Эсәр һыуға, морстарғаа, һутҡа, йәшел сәйгә өҫтөнлөк бирегеҙ. Алкоголь, һыра, газлы эсемлектәр эсмәҫкә тырышығыҙ, улар һыуһынды ла ҡандырмай, организмда алмашыу процестарын тотҡарлай. Бынан тыш, эҫелә алкоголь ҡанға тиҙерәк һеңә, йәғни кеше тиҙ иҫерә. Нәмә ашарға? Йәшелсә, емеште күберәк ҡулланырға тырышығыҙ. Эҫелә аҙыҡ-түлектең тиҙ боҙолоуын онотмағыҙ. Ағыуланыуға юл ҡуймау өсөн һөт ризыҡтарын, майонезлы салаттар, кремлы ризыҡтар, бешерелгән колбасаны һаҡлау шарттарына айырыуса иғтибарлы булығыҙ. Нимә кейергә? Эҫелә кейем тәбиғи сүстәрҙән торған еңел булырға тейеш. Яҡты туҡымаларҙан эшләнгән әйберҙәргә өҫтөнлөк бирегеҙ. Баш кейемдәре хаҡында онотмағыҙ. Һалҡынды ҡайҙан эҙләмәҫкә? Тымау тейҙереп ауырыуҙарҙан һаҡланыр өсөн вентилятор йәки кондиционерҙың һауа ағымы аҫтында ултырмағыҙ. Әгәр был процедура һеҙҙең өсөн ғәҙәти булмаһа, һалҡын душ ҡабул итмәгеҙ. Йышыраҡ ҡулдарығыҙҙы һәм битегеҙҙе һыу менән сайҡатығыҙ. Асыҡ һыу ятҡылыҡтарында һыу инеү миҙгеле рәсми башланғас ҡына һыу инегеҙ. Бынан тыш, Башҡортостандың Ғәҙәттән тыш хәлдәр буйынса дәүләт комитеты хәбәр итеүенсә, ҡоро эҫе көндә көнкүреш һәм урман янғындары сығыу хәүефе арта. Шуға бәйле янғын хәүефһеҙлеге ҡағиҙәләрен теүәл үтәүегеҙҙе һорайбыҙ. Фото: ok.ru