“Роспотребнадзор”ҙың Башҡортостан буйынса идаралығы етәксеһе Анна Казак үткәргән матбуғат конференцияһы көнүҙәк темаларҙың береһенә арналды. Быйылғы йәй талпан энцефалиты һәм сысҡан биҙгәге менән сирләп китеү осраҡтары буйынса мөрәжәғәттәр артҡан. Лаборатор тикшеренеүҙәр күрһәтеүенсә, был ауырыуҙар талпандарҙа һәм сысҡандарҙа хәҙер йышыраҡ осрай. Анна Казак һәм идаралыҡтың эпидемиологик күҙәтеү бүлеге етәксеһе Венера Саттарова аңлатыуынса, талпан ҡаҙалыуы сәбәпле республика райондарында дауалау учреждениеларына 42 тапҡыр мөрәжәғәт иткәндәр, шуларҙан ете кешелә талпан энцефалитеты табылған, уларға кисекмәҫтән дауалау билдәләгәндәр. Сирлеләр араһында балалар юҡ. Был кешеләр, ҡағиҙә булараҡ, “хәүеф төркөмө”нә инә, йәғни һөнәре буйынса тәбиғәттә эшләргә тура килгәндәр (ә ундайҙар республикала 37 меңгә яҡын кеше). Хәҙер урманға еләк һәм бәшмәк йыйырға барыусылар аҙайғандан-аҙая бара, уның ҡарауы, ял көндәрендә тәбиғәткә сығып шөшлөк ҡыҙҙырырға яратыусылар күп, ҡалалар янында индивидуаль торлаҡ төҙөлөшөнөң киңәйеүе лә ундағы кешелерҙең талпандан зыян күреү хәүефен арттыра икән. “Талпан үлән башында аҙналар-айҙар буйы ҡорбанын көтөп ултырырға һәләтле”, – ти Анна Казак. – “Уның 1,5 метрҙан да бейегерәккә һикерә алған осрағы теркәлмәгән, шуға күрә кешенең йөҙөнә эләгеү ҡурҡынысы юҡ тиерлек, әммә урманда аяҡтарҙы һәм ҡулды беләҙегенә хәтлем кейем менән ҡаплау йөрөү мотлаҡ”. Талпан биҙгәге кешегә хайуандар аша ла йоғорға мөмкин икән. Мәҫәлән, ул кәзәне тешләһә, был кәзәнең һөтөн эсеү үтә хәүефле. Әммә тешләгәнме-юҡмы икәнен билдәләү, тәбиғи, мөмкин түгел, шуға күрә һөттө тик эшкәртеп (пастеризациялап) эсергә була. Сысҡан биҙгәге менән былтыр йыл барышында өс меңгә яҡын кеше сирләгән. Матбуғат конференцияһында үткән йыл Туймазы районында булған хәлде иҫкә төшөрҙөләр: көҙ ихатала бесән бушатҡан ирҙәр ошо сиргә юлыға һәм дауаханала уларҙың икәүһен ҡотҡара алмайҙар. Тимәк, бындай эштә лә һаҡ булырға кәрәк. Венера Саттарова яҙ тышта йорт тирәһен йыйыштырғанда ла һаҡланырға онотмаҫҡа, был эште мотлаҡ битлек кейеп башҡарырға кәңәш итте. Автор фотоһы.