“Беҙ бит ауыл егеттәре”

Республикала инде өсөнсө йыл рәттән “Атайсал” проекты уңышлы тормошҡа ашырыла. Был сара илһөйәр яҡташтарыбыҙға изге ғәмәлдәрҙе тормошҡа ашырыуҙа дәрт, сәм өҫтәне, тип әйтһәк тә хата булмаҫ. Туймазы районында ла ошондай илһөйәрҙәр бар. Бөгөн һеҙҙе уларҙың береһе – Азат Ғимазетдинов менән таныштырабыҙ. Азат Мәкәрим улы үҙенең фекерҙәштәре менән бергә “Атайсал” проекты буйынса райондың Илсембәт ауылында дүрт эште ғәмәлгә ашырыуға өлгәшкән. – Ватсаптағы “Беҙ бит ауыл егет­тәре” тигән төркөмөбөҙ ауыл халҡы­нан һәм яҡташ ир-егеттәрҙән тора. Тобакүлде һәм уның тирә-яғын төҙөкләндереү, тергеҙеү менән бер нисә йыл шөғөлләнәбеҙ. Бөгөнгә күп эш башҡарылған. Яҡтылыҡ өсөн бағаналар ҡуйылған, электр ут үткә­релгән, аэрация өсөн насостар һатып алынған, мотопомпа һәм балыҡ сел­бәрәләре ебәрелгән, күл тәрәнәй­телгән, биләмәһе ҡыуаҡлыҡтарҙан һәм ҡый үләндәренән таҙартылған, эргә-тирәһен йыйыштырыу буйынса өмәләр үткәрелә, пирс ҡуйылған (шул иҫәптән йылғала ла). 2022 йылда халыҡҡа ял итеү, эйеү өсөн урын эшләнде. Быйыл ял зонаһы әүһә­ләйҙәр, ултырғыстар һәм тағы ике эскәмйә менән тулыландырылды. Беҙ иҫ киткес матур ерҙә йәшәйбеҙ. Ауылыбыҙҙа Ыҡ йылғаһы аға, ике күл бар. Халыҡ өсөн ошо ял урындары кәрәк. Биләмә таҙартылды һәм унда үлән сәселгән, уны даими ҡырҡып, тәрбиәләп торалар. Бөтә эш “Беҙ бит ауыл егеттәре” төркө­мөнөң аҡсалата һәм физик ярҙамы арҡаһында башҡарыла, – тип фекерен уртаҡлашҡан Азат Мәкәрим улы “Атайсал” проекты сайтында. Шулай уҡ Илсембәттә, башҡа күп кенә ауылдарҙағы кеүек үк, Яңы йылды байрам итеүгә ихлас әҙерлә­нәләр. 2021 йылда “Беҙ бит ауыл егеттәре” төркөмө егеттәре байрам мөхитен булдырыу, уны тағы ла нығыраҡ йәнләндереү маҡса­тында Яңы йыл майҙансығын биҙәү эшен үҙ өҫтөнә алған – шыршы, Ҡыш бабай, Ҡарбабай ҡуйғандар. Халыҡ иһә биҙәүестәрҙе, уйынсыҡ­тарҙы, мишураны алдан әҙерләгән. Илсембәт ауылы халҡы менән берлектә күлде тергеҙеү һәм уның биләмәһен төҙөкләндереү буйынса башҡарылған эшкә йомғаҡ яһау өсөн күптән түгел “Ауыл кисе” байрамы ойошторолдо. Унда эстрада артис­тары һәм ауылдың һәүәҫкәрҙәре концерт ҡуйҙы. Шулай уҡ сауҙа һәм уйындар майҙаны гөрләп торҙо. Планлаштырылған сығымдар – концерт өсөн түләү, сәхнә ҡуйыу һәм эргә-тирәләге биләмәне биҙәү, уйындар үткәреү өсөн бүләктәр һатып алыу изге күңелле яҡташтар ярҙамында хәл ителде. Рәмилә МУСИНА