Коронавирус пандемияһы баҫылыуы менән республиканың ковид- госпиталдәре эштәрен күп профилле режимға күсерҙе. Хәҙер Зубов, Стәрлетамаҡ, Сибай һәм Туймазылағы клиник-диагностик йоғошло ауырыуҙар үҙәктәре коронавирус инфекцияһынан ғына түгел, ә башҡа йоғошло сирҙәрҙән дә дауалай. Госпиталдәрҙең барыһы ла бер проект буйынса төҙөлгән, заманса ҡорамалдар менән йыһазландырылған. Һәр госпиталь бинаһы ете “нурҙан” тора, уларҙа ҡабул итеү, реанимация, педиатрия,терапия, йоғошло сирҙәр бүлексәләре урынлашҡан. Госпиталдең төп үҙенсәлеге – һәр подразделениеның автономлы эшләүе. Инфекцияның бер корпустан икенсеһенә таралыу, йоғоу хәүефе юҡ. Филиалдарҙа йоғошһоҙландырыу бүлексәләре эшләй. Бүлексәләр технологик процестарҙың теүәл үтәлешен иҫәптә тотоп проектланған һәм ҡиммәтле ҡорамалдар менән йыһазландырылған. Уларҙы урынлаштырыу һәм инженер тәьмин итеүе буйынса ҡәтғи талаптар ҡуйылған. Хәҙерге ваҡытта Урал аръяғы клиник-диагностик йоғошло ауырыуҙар үҙәгендә – 136, Туймазы үҙәгендә – 160, Зубовта –190, Стәрлетамаҡ госпиталендә 130 урын әҙерләнгән. Пациенттарҙың күбеһе геморрагик биҙгәк, киҫкен вирус инфекцияһы, пневмония, һыу сәсәге, эсәк инфекцияһы, гепатит, ВИЧ, Лайма сире диагноздары менән үҙәктәрҙә дауалана.Балалар өсөн айырым палаталар булдырылған. Бүлексәләр дауалау-диагностика аппараттары, мониторинг системалары, һыуытҡыстар менән йыһазландырылған. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.