Элегерәк, ҡыҙылса сире менән балалар ғына сирләй, тип иҫәпләйҙәр ине. Әммә һуңғы йылдарҙа инфекция “өлкәнәйҙе”. Ваҡытында прививка яһатмаған кешеләр араһында сир тиҙ ҡабынып, таралып китеүсән. “Өлкәндәр сирҙе ауыр үткәрә. Инфекция сир булараҡ ҡурҡыныс түгел, ә үҙенең энцефалит, менингит кеүек өҙлөгөүҙәре менән хәүефле. Өҫтәүенә нервы системаһына емерткес тәьҫир итә”, – ти Талбазы үҙәк район дауаханаһының табип-эпидемиологы Наил Әсфәндиәров. Юғары температура, тәнгә сабыртма сығыуы, баш ауыртыуы – сирҙең тәүге билдәләре. Республикала быйыл ошо инфекцияны йоҡтороу осраҡтары булғыланы. “Роспотребнадзор”ҙың Күмертау территориаль бүлеге начальнигы Кристина Памурзина әйтеүенсә, кешеләр вирусҡа бик һиҙгер, тиҙ йоҡтора. Бер сирленән 18 кешенең ауырыуҙы йоҡтороуы ихтимал. Ҡыҙылса биҙгәк тотоуҙан, тымау, конъюнктивит, йүтәл кеүек катараль билдәләрҙән башлана. Юғары температура менән үтә, хатта ҡырҡ градусҡа тиклем күтәрелеүе мөмкин. Сирҙе йоҡторғандан һуң дүртенсе-бишенсе көндә тәндә сабыртмалар күренә башлай. Улар тәүҙә ҡолаҡ артын, битте, муйынды ҡаплай, аҙаҡ күкрәк һәм ҡорһаҡ тирәһенә күсә, ҡул һәм аяҡтарға ла сыға. Табип йыш ҡына ата-әсәләрҙең, сирҙе балалар өсөн хәүефһеҙ тип иҫәпләп, прививка яһатыуҙан баш тартыуын билдәләне. Уның әйтеүенсә, был дөрөҫлөккә тап килмәй: сирҙе эләктергән һәр 15-се кеше өҙлөгөүҙәргә дусар. Хәүефле отит, гайморит, пневмония, энцефалит кеүек сирҙәргә юлыҡтырыуы ихтимал. Бынан тыш, эпилепсия өйәнәгенә, һуҡырайыуға, һаңғырауланыуға килтереүе бар. Ҡыҙғанысҡа ҡаршы, һәләк булыусылар ҙа булғылай, тип иҫкәртә табип. Был сирҙән һаҡланып буламы? Ҡыҙылсаға ҡаршы үҙенсәлекле дауа юҡ. Берҙән-бер ышаныслы ысул – иммунизация. Балаларға планлы вакцинация – бер йәштә, ревакцинация алты йәштә үткәрелә. Прививка эшләнеүе тураһында мәғлүмәт булмаған өлкәндәргә ул 35 йәшкә тиклем яһала, хәүефле төркөмгә ҡараған хеҙмәткәрҙәргә – 55 йәшкә тиклем. Документтар менән раҫланған ике прививка булыуы мөһим, ти табип. Сир айырыуса бер йәшкә тиклемге сабыйҙар өсөн хәүефле, шулай уҡ хәүеф төркөмөнә ҡараған биш йәшкә тиклемге балаларҙың сәләмәтлегенә өҙлөгөүҙәре менән ҡурҡыныс тыуҙыра. Һаулығығыҙға ҡарата иғтибарлы булығыҙ, сирләп киткәндә инфекцияны башҡаларға йоҡтормау өсөн йәһәтерәк медицина ярҙамына мөрәжәғәт итегеҙ, ваҡытында прививка яһатығыҙ, тип саҡыра барыбыҙҙы табиптар. Динә Арыҫланова