Ауырғазы районында командировкала булғанда, махсус хәрби операцияла ҡатнашырға үҙ теләге менән киткән яугирҙең ата-әсәһе менән күрешеп һөйләшергә уңайы сыҡты. Йәшеллеккә күмелгән ихатала урынлашҡан ҡәҙимге ауыл йортона аяҡ баҫҡанда ниндәйҙер тулҡынланыу, хатта борсолоу биләп алды. Улдары яу яланында йөрөгән ата-әсә ниндәй кәйефтә, асылып һөйләшә алырҙармы, тигән уйҙар ҙа борсоно. Әлфиә менән Рәмил Ҡаһировтар һәүетемсә донъя хәстәрҙәре менән йәшәй, яугир улдарының һирәк шылтыратыуҙарына, ҡунаҡҡа ҡайтҡан ейән-ейәнсәрҙәренә ҡыуанып, донъяларҙың тынысланырына, тормоштоң үҙ ярҙарына ҡайтырына тәрән ышанып йәшәүҙе дауам итә. Алсаҡ йөҙлө өлкәндәргә ҡарап, шул тыныс ҡиәфәтте һаҡлау уларға ни ҡәҙәр ауыр булғанына төшөнәһең. – Улыбыҙға армияла хеҙмәт итергә тура килмәне, әммә, хәрби булам барыбер, мине хәрби училищеға ебәрегеҙ, тине лә йөрөнө. Күрәһең, теләге ҡабул булғандыр, – тип башланы әсә улы тураһында һүҙен. Әлфиә апай үҙен тыныс тоторға тырыша, тулҡынланыу-борсолоуын йөҙөнә сығармай. – Ватанды һаҡлау ир-егеттең бурысы икәнен аңлайым, башҡаса булыуы мөмкин түгел икәнен дә беләм. Бер минең генә улым йөрөмәй, күпме әсә әле минең хәлдә, тип фекер төйнәйем дә баламдың имен-һау ҡайтып төшөрөнә ныҡлы өмөт итеп көтә бирәм, – ти ул, тауышы бер аҙ ҡалтырап китә. Махсус хәрби операция иғлан ителеү менән, аталы-уллы икәү хәрби билеттарын теүәлләй башлай. Эйе, заманында әрмелә танк часында элемтәсе булып хеҙмәт иткән Рәмил ағай үҙе етенсе тиҫтәне түңәрәкләп килһә лә, ошондай ауыр ваҡытта илебеҙгә иң кәрәкле хәрби һөнәрҙәрҙең береһенә эйә булғанын иҫенә төшөрөп, яуға юлланмаҡсы була... Быға ҡәҙәр Себер яҡтарына эшкә йөрөп торғас, геройыбыҙҙың ысынында иһә яуға йыйынғанын яҡындары, хатта кәләше лә башта белмәй. Аҙаҡҡа табан ғына хәл асыҡлана. Үҙ теләге менән хеҙмәткә китергә булған улдарының уйын ата-әсә аңлап ҡабул итә. Әлфиә апай: “Өс бала атаһы бит улым, моғайын, кире ҡайтарырҙар”, тип йәшерен генә өмөтләнә-өмөтләнеүен. Башта шул уй уға тыныслыҡ бирә, ә улдарын табиптар комиссияһы хеҙмәткә яраҡлы, һаулығы яҡшы тип тапҡас инде, ғәзизенә изге теләктәрен теләп, юлға оҙатыуҙан башҡа сара ҡалмай. – Иптәштәре, туғандарыбыҙ уйынан кире ҡайтарырға тырышып ҡараны, әммә ул ныҡлы ҡарарға килгәйне инде. Холҡон белгәс, беҙ башҡаса ул турала һүҙ ҡуҙғатманыҡ, – ти өлкәндәр. – Кире бороп ҡайтармаһындар ғына инде, тип көйҙө әле. Комиссияны үткәс, ныҡ ҡыуанды, ниһайәт, күңелендә йөрөткән уйын тормошҡа ашыра алғанына ҡыуанғандыр, тим, – тине атай кеше, йөҙөндә улы менән ғорурланғаны ла сағылып ҡала. Тормошон бөтөнләй икенсе тарафҡа йүнәлтеп, юлға сыҡҡан улын әсә кеше оҙата алмай: Себерҙә донъя көткән ҡыҙының балаларын ҡарашырға киткән сағы тура килә. “Әсәй, һин ҡайтып торма, йәме. Иларһың, миңә лә ҡыйын булыр”, – ти улы. Шунан бирле әсә менән ул араһын кеҫә телефондары ғына бәйләй. – Әле яу яланында булған йә яуға инергә йыйынған егеттәрҙең ата-әсәһенә нимә тип әйтер инегеҙ? – тип һорайым. – Ҡурҡмаһындар, насар уй йөрөтмәһендәр, иҫән-имен булып, еңеү менән ҡайтыуҙарын ғына теләргә кәрәк. Атай-әсәйҙәрҙең изге теләге балаларҙы һаҡлар. Шуныһы хаҡ: илгә хәүеф янағанда, ир-егеттәр ситтә ятып ҡала алмай, кем дә булһа Тыуған илде, халыҡты яҡларға, һаҡларға тейеш, – тип яуаплай Рәмил Таһир улы. – Беҙҙең халыҡ борон-борондан, Ватанға хәтәр ябырылғанда, ажарланып алышҡа сыҡҡан. Улдарыбыҙ шул ата-бабалар рухын йөрөтә, ҡаһарман йөрәкле батырҙар, уларға ышанырға, яуҙа булғанда фәрештәләре һаҡларына өмөтләнергә, аҡ уйҙарҙа ғына булырға кәрәк! Шуларҙы һөйләгәндәге ҡәтғилегенә ҡарап, был ябай ауыл ир-егетенең, йәшерәк сағы булһа, үҙе лә ике лә уйламай ҡулына ҡорал алған булырына инанаһың... Артиллерия часына билдәләнеп, ил һағына баҫҡан “Космос”тың ҡайтыуын ата-әсәһе генә түгел, уның ике ҡыҙы, бер улы, кәләше лә түҙемһеҙләнеп көтә. Үҙ теләге менән дошманға ҡаршы сығырға хәл иткән ҡаһармандың, бар яугирҙәребеҙҙең рухы ҡаҡшамаһын, иҫән-имен, еңеү менән ҡайтһын! - Рәүилә ҒАТАУЛЛИНААуырғазы районы