“Һаулыҡ һаҡлау” милли проектына ярашлы, Күмертау ҡала дауаханаһына фельдшер-аукшерлыҡ пункттары өсөн электрокардиографияны теркәү һәм дистанциянан тапшырыу өсөн 16 модулле система алынды. Был модулле системаларҙың өҫтөнлөгө электрокардиографияны дистанциянан тапшырыу, табиптың тиҙ һығымта яһай алыу, тикшереү протоколын пациенттың электрон картаһында һаҡлау мөмкинлеге менән аңлатыла.Яңынан тикшереү үткәндә үҙгәрештәр динамикаһын баһаларға була.Шулай уҡ яңы ҡорамал икеләнгән осраҡтарҙа пациенттарға дистанциянан тороп консультация бирергә мөмкинлек тыуҙыра. –Яңы модулле системалар төпкөл ауылдарҙа эшләгән фельдшерҙарҙың эшен күпкә еңеләйтәсәк, диагностика процесын тиҙләтәсәк, – ти Күмертау ҡала дауаханаһының баш табибы Олег Астахов. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен ( 100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына (национальный проект “Здравоохранение”) ярашлы, инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе. Фото: Һаулыҡ һаҡлау министрлығы.