"ҠошЮлы"на рәхим ит!

"ҠошЮлы" республика бард фестивале быйыл ун икенсе тапҡыр үткәрелә һәм Башҡортостандың атҡаҙанған сәнғәт эшмәкәре Илшат Яхиндың яҡты иҫтәлегенә арнала. 7, 8, 9 июль Ейәнсура районында үтәсәк сарала гитарала уйнап йырлаусылар бәйгеһенән, "ҠошЮлы" лауреаттарының сығыштарынан торған гала-концерттан тыш программала төнгө усаҡ янында йырҙар йырлау, "ҠошЮлы уҙышы" йүгереү марафоны, йырға һүҙҙәр яҙыу оҫталыҡ дәресе, түңәрәк өҫтәл, спорт ярыштары һәм һыу һибешеү ҡаралған. “ҠошЮлы”на 2012 нигеҙ һалына, был ваҡыт арауығында фестиваль тулы бер хәрәкәткә олғаша, уның эшмәкәрлеге йәй һайын фестиваль үткәреүгә генә ҡайтып ҡалмай, эш йыл әйләнәһенә ҡайнай: төрлө ижади осрашыуҙар, фатирниктар уҙғарыу, “Төнгө ултырыш”, “ҠошЮлы. Балалар” кеүек айырым проекттар булдырыу һәм башҡалар. “ҠошЮлы” биш йыл рәттән Ейәнсура районында үткәрелде, артабанғы биш йылда Башҡортостандың төрлө райондарын иңләне: Әбйәлилдә, Ҡыйғыла, Ишембайҙа уҙҙы. Фестиваль былтыр тыуған ере Ейәнсураға кире әйләнеп ҡайтты, ул быйыл да ошо районда үтәсәк. Интернетта гитарала уйнап йырлаған сығыштарын ебәргән бәйгеселәр фестивалдең үҙенә, ҙур сәхнәгә саҡырыла, артабан баһалама ағзалары улар араһынан еңеүсене билдәләйәсәк. Төп бүләк – гитара! Әйткәндәй, фестиваль дә, “ҠошЮлы”ның хәрәкәте үҙе лә сәләмәт тормошто пропагандалай, “ҠошЮлы” – ул айыҡ фестиваль. Быйылғы “ҠошЮлы”н үҙенең сығышы менән билдәле сәнғәт эшмәкәре Зәйнетдин биҙәйәсәк. Унан тыш, инде исемдәре илгә танылған, тап “ҠошЮлы” ярҙамында ҙур сәхнәгә сыҡҡан Тимур Әхмәтйәнов, Тимур Ямалов, Илгиз Гизмо, Миңзәлә Яхина һәм башҡа фестиваль лауреаттарының сығыштары күҙалланған. “ҠошЮлы” – ул гитара, йыр ғына түгел, шиғриәт тә! Тап ошо фестиваль сиктәрендә йыл да республика шиғриәт бәйгеһе үткәрелеп килә, башҡорт әҙәбиәтендә яңынан-яңы исемдәр аса. Быйыл үҙенсәлекле күренешкә шаһит булыу мөмкинлеге бар: “ҠошЮлы” йондоҙҙары үҙҙәре шиғри һүҙен сәхнәнән еткерәсәк. "ҠошЮлы"ның тоғро дуҫтарын өс көн дауамында тәбиғәт ҡосағында гитара моңона сорналырға, башҡа ҡыҙыҡлы ваҡиғалар уртаһында ҡайнарға саҡырабыҙ!"ҠошЮлы" — ул сәләмәт тормошҡа әйҙәгән айыҡ фестиваль, "ҠошЮлы" — ул туған башҡорт телендә аралашҡандарҙы туплаған рух байрамы! Айгөл ҒӘБИТОВА.