Башҡортостандағы һәр ҡала йәки райондың барлыҡ ҡаҙаныштарын, көйөнөстәрен һәм тәү сиратта урындағы һөйөнөстәрен киң мәғлүмәт саралары яҡтырта. Ҡырмыҫҡалы районында иһә “Даирә”, “Кармаскалинская новь” һәм “Үҙән” гәзиттәре донъя күрә. Был матбуғат баҫмалары хеҙмәткәрҙәре урындағы халыҡҡа төбәк иҡтисады, социаль, мәҙәниәт һәм башҡа өлкәләрҙән яңылыҡтарҙы еткерә, яҡташтарының йәшәйеше хаҡында бәйән итә. Башҡорт телендә донъя күргән “Даирә” гәзитендә лә район тормошонан мөһим мәғлүмәттәр, халыҡты борсоған мәсьәләләр күтәрелгән мәҡәләләр донъя күрә. Ғөмүмән, һәр гәзит – ябай халыҡ менән йәмғиәтте тоташтырып торған үҙенсәлекле күпер ул. Рәсәйҙә, Башҡортостанда барған хәл-ваҡиғалар менән, ғәҙәттә, телевидениенан, үҙәк гәзиттәрҙән танышһаҡ, урындағы тормошто, нигеҙҙә, район баҫмаларынан ентекле беләбеҙ. Гөлсәсәк Сәлих ҡыҙы Аласованың “Даирә” гәзитендә эшләүенә сирек быуат ваҡыт үткән. Уның матбуғат тигән мауыҡтырғыс донъяға килеп инеүе лә бик үҙенсәлекле. “Шуныһы ҡыҙыҡ: бер ҡасан да гәзиттә эшләрмен тип уйламай торғайным. Әле яҙмышымдың “Даирә”гә бәйле булыуына һис үкенмәйем, – ти Гөлсәсәк Сәлих ҡыҙы. – Мине был һөнәргә гәзит-журнал китап уҡырға яратыуым алып килгәндер, тип уйлайым. Бала саҡта уҡ ауыл мәктәбендәге һәм китапханаһындағы төрлө повесть-романдар менән танышып бөткәйнем. Әсәйем менән атайым да уҡырға ярата ине. Апайым Гөлнара Иҫәнғолова, “Пионер” журналына мәҡәләләр яҙып, “Артек” лагерына барып ҡайтыу бәхетенә өлгәште”. Өфө ҡалаһындағы 1-се педагогия училищеһында белем алған ҡыҙ Ҡырмыҫҡалы ауылындағы балалар баҡсаһына тәрбиәсе булып эшкә төшә һәм, бер нисә йыл үткәс, ҡыҫҡартыуға эләгә. Райондың хеҙмәт биржаһына иҫәпкә торған Гөлсәсәк Аласоваға урындағы “Даирә” гәзитенә тәржемәсе булып эшкә барырға тәҡдим итәләр. “Башта икеләндем, әлбиттә. “Гәзит һынлы гәзиттә нисек эшләрмен? Ҡулымдан килерме?” тигән уйҙар йөҙәтте, – тип хәтерләй ул. – Мин эшкә төшкән ваҡыттағы баш мөхәррир Миҙхәт Рәжәповҡа, дубляж буйынса мөхәррир Эльза Саттароваға рәхмәтем сикһеҙ. Тап улар минең остазым булды, эшкә өйрәтте. Тәржемәләрем ыңғай уҡ баҫылмаһа ла, артабан улар гәзиттә сыға башланы, унан һуң мәҡәләләрем дә донъя күрҙе”. Үткән быуаттың 90-сы йылдарында “Даирә”лә эш башлаған Гөлсәсәк Аласова, шулай итеп, тәржемәсе, хәбәрсе, хаттар бүлеге мөдире, яуаплы секретарь вазифаларын атҡарған. Хәҙер ул – ошо баҫмала баш мөхәррир. Бөгөн редакция хеҙмәткәрҙәре башҡорт телендә сыҡҡан район баҫмаһына яҙҙырыу, заман ауырлыҡтарына ҡарамаҫтан, тиражды кәметмәү өҫтөндә даими эшләй. Ауылдарға сығып, ихата һайын йөрөп, тигәндәй, халыҡ менән гәзитте, туған телде һаҡлап ҡалыу тураһында һөйләшеүҙәр, аңлатыу эштәре алып барыла. “Бер нимәгә ҡарамай, гәзитебеҙгә тоғролоҡ һаҡлап, уны алдырған уҡыусыларыбыҙға ҙур рәхмәтлебеҙ. Ниндәй генә ҡаршылыҡтар булмаһын, улар хәлебеҙгә инә. Кисә генә уҡытыусылар менән дә баҫмаға яҙылыу тураһында һөйләштек”, – тине Гөлсәсәк Сәлих ҡыҙы, хәҙер һәр матбуғат баҫмаһын борсоған темаға ҡағылып. Туған телебеҙ, мәҙәниәтебеҙ, әҙәбиәтебеҙ һәм матбуғатыбыҙ тығыҙ бәйләнештә икән, тимәк, туған тел дә йәшәйәсәк тигән һүҙ. Башҡорт телендә туған халҡының йәшәйешен яҡтыртҡан, тарихын гәзит биттәрендә сағылдырған хеҙмәт коллективы артыҡ ҙур түгел. Уларҙың һәр береһенең төп маҡсаты – халҡыбыҙҙың милли рухын һаҡлаған баҫманы йөкмәткелерәк, уҡымлыраҡ һәм замансараҡ итеү. Баш мөхәррир урынбаҫары Фәнилә Сәлимгәрәева, хаттар бүлеге мөдире Фирүзә Рәхмәтуллина, матбуғатҡа яҙылыу бүлеге мөдире Розалия Назарова, гәзитте нәшерләүсе Миләүшә Дәүләнова – тап шундайҙарҙан. Заман башҡа, заң башҡа, тигәндәй, киң мәғлүмәт сараларында хәҙер рекламаһыҙ ҙа булмай: ул да баҫыла гәзит биттәрендә. Әминә Ҡолғонина Ҡырмыҫҡалы районында донъя күргән өс гәзиттә лә реклама агенты булып эшләй. Ҡырмыҫҡалы мәғлүмәт үҙәгенең кадрҙар бүлеге етәксеһе Фәнисә Бакирова – төбәктә донъя күргән һәр баҫмала эшләгән хеҙмәткәрҙең тоғро кәңәшсеһе, кәрәк икән хатта ярҙамсыһы ла. Водителдәр Рәмил Шәйбәков, Ирек Хисмәтуллиндың да яңылыҡтарҙың гәзит уҡыусыға тиҙерәк барып етеүендә өлөшө ҙур. Әйткәндәй, уларҙың барыһы ла матбуғатта оҙаҡ йылдар эшләй. Илдәге төрлө хәл-ваҡиғалар, үҙгәрештәр, баҙар иҡтисадына күсеү, көрсөк, хаҡтарҙың күпкә артыуы үҙҙәрен һиҙҙермәй ҡалдырмай, әлбиттә. Был матбуғатта ла сағылыш таба, әммә ташҡа баҫылған мәңгелек, ташҡа баҫылған һүҙ көсө күпкә ҡеүәтлерәк. “Районыбыҙҙа изге күңелле кешеләр йәшәүе ҡыуандыра. Улар ярҙамында махсус хәрби операцияла ҡатнашҡандарҙың ғаиләләренә 27 дана “Даирә”гә яҙҙырттыҡ, – ти Гөлсәсәк Аласова. – Иң мөһиме – яугирҙәребеҙ иҫән-һау булып, еңеү менән ҡайтһын, тип теләйем”. Айһылыу НИЗАМОВА