Ҡырмыҫҡалы районының Иҫке Ҡыйышҡы ауылында намыҫһыҙ төҙөүсе ғәмәленән зыян күргән өлөшсөләрҙең хоҡуҡтары тергеҙелде. “Өфө Ҡырым” торлаҡ комплексының ауылдағы Сик урамындағы ике йорто файҙаланыуға тапшырылды. Был торлаҡтың дөйөм майҙаны 5 меңдән ашыу квадрат метр тәшкил итә. - Башҡортостан Республикаһының Биләмәләр үҫеше фонды, федераль механизмдарҙы файҙаланып, төҙөлөштө тамамланы. Яҡын арала 91 өлөшсө өс ҡатлы йорттарҙан фатирын аласаҡ, - тип хәбәр ите Башҡортостандың төҙөлөш һәм архитектура министры урынбаҫары Артем Ковшов. Әйткәндәй, 2019 йылдың мартында Башҡортостандың Арбитраж суды төҙөлөш эштәрен алып барған “ИнвестКапиталСтрой” яуаплылығы сикләнгән йәмғиәтен көрсөккә килеп терәлгән ойошма тип таныны. 2020 йылдың көҙөндә Биләмәләр үҫеше фондының Күҙәтеүселәр советы тарафынан Сик урамындағы 1-се, 2-се йорттар төҙөлөшөн тамамлау тураһындағы ҡарарҙы ҡабул ителде. Ә 3-сө йорттан фатир алыусыларға аҡсалата компенсация биреү ҡаралған. Быларҙың барыһы ла Рәсәй Президенты Владимир Путиндың “май” указдарына ярашлы барлыҡҡа килгән “Торлаҡ һәм ҡала мөхите” милли проекты (национальный проект “Жилье и городская среда”) бурыстарын тормошҡа ашырырға булышлыҡ итә. Сығанаҡ, фото: building.bashkortostan.ru/presscenter/news/552948/