Ике тармаҡ та үҙенсәлекле

2023 йылдың ғинуарынан июнь айына тиклем республиканың Берҙәм лицензиялар сайтында травматология һәм ортопедия буйынса эшмәкәрлеккә тәү тапҡыр лицензиялар алған медицина ойошмалары һаны 2,3 процентҡа артҡан. Элек теркәлгән 298 ойошмаға йәнә ете медицина ойошмаһы өҫтәлде. –Травматология һәм ортопедия – хәҙерге заман медицинаһында киң ҡулланылған белгеслектәр. Ике тармаҡ та сирҙәрҙе һәм һөйәк-мускул системаһы имгәнеүҙәрен иҫкәртеү һәм дауалау менән шөғөлләнә. Шуның менән бергә һәр береһенең үҙенсәлектәре һәм ҡулланыу өлкәһе бар, – тип һөйләй Һаулыҡ һаҡлау министрлығының бүлек начальнигы Эльвира Тәхәүетдинова. Травматология пациенттарҙы эске һәм тышҡы факторҙар арҡаһында барлыҡҡа килгән төрлө травмаларҙы дауалау менән шөғөлләнә. Автомобиль аварияларында, йығылып төшкәндә, спортта һәм башҡа бәхетһеҙлек осраҡтарында алынған имгәнеүҙәр булыуы мөмкин. Ортопедия төрлө йәштә ауыртыныу тыуҙырған һөйәк һәм быуындар сирҙәрен дауалау менән шөғөлләнә. Медицина эшмәкәрлеге буйынса лицензия алыуҙы ябайлаштырыуға республика министрлығы ярҙам итә. “Ҡыҙыу линия” ойошторолған. Тәүге тапҡыр лицензия алыуҙы рәсмиләштереү ваҡыты хәҙер 15 көнгә тиклем ҡыҫҡартылды. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен ( 100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына (национальный проект “Здравоохранение”) ярашлы, инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе. Фото: Һаулыҡ һаҡлау министрлығы.